 |
| Deretos lìberos. Url imàgine |
In Grètzia sunt crompende·nche sos primos
gùtios lados de su memorandum sigladu su mese de trìulas dae Alexis
Tsipras cun sos credidores europeos. Annùntziu de una temporada mala.
Sas primas a èssere infustas ant a èsser ses ìsulas gregas famadas a
mòvere dae Mykonos e Santorini in ue - prima die de Santugaine - est
intradu s'aumentu grae de s'Iva. A su 30%. Sas àteras sunt Rodi, Naxos,
Paros e Skiathos, in ue s'alìcuota agevolada primàrgia est colada dae su
16 a su 23% annuntziende duncas aumentos graes pro residentes e
istràngios. Bàgiat pro ammentu chi, in Grètzia, su turismu ingendrat su
20% de su Pib.
In pessu posta in butzaca sa vitòria eletorale,
Tsipras at dadu duncas cursu a sos impinnos pigados cun sa Tròika. E
finas su partidu de sos Gregos indipendentes - chi in istade si fiat
opostu cun fortza - si nch'at dèvidu ingurtire su bucone marigosu e galu
nde tenet in buca su ranchidore. Sas dudas chi s'anneu pro su pòpulu
gregu non si firmet inoghe, sunt prus chi non fundudas. E fundadas.
Dudas cunfirmadas finas dae s'agentzia Reuters e dae su cuotidianu Ekathimerini chi ammentat: «s'aumentu
de s'Iva faghet parte de sos acordos, est a beru, ma est noa de oe chi
su Ministèriu de sas finàntzias chèrgiat tratare cun sos credidores pro
nche revocare su provedimentu». Su Daily Telegraph nât imbetzes chi s'Ufìtziu de su turismu ellènicu no est orioladu meda, a dae chi at dadu a intèndere chi «sa Grètzia -memorandum o mancu - at a abarrare pro semper una meta agradèssida a sos istràngios de totu su mundu».
