Afghanistan. Atacu talebanu in intro de note

de Maurìtziu Sale

Deretos Ap/Rahmatullah Nikzad

Sa noa est de custu mangianu. L'at dada a intèndere unu comunicadu de s'Ansa, semper presente in Afghanistan a dae chi sos talebanos sunt ammaniende atentados semper prus pretzisos e atzudos.

Unu grustu de militantes, cun in mesu unos cantos"kamikazes", nch'est cròmpidu in intro de note a sa presone tzentrale, in sa provìntzia orientale de Ghazni, pro nch'illiberare prus de 350 presoneris talebanos.

«Semus averguende totu sos datos, pro istransire sas noas farsas e pro no arriscare revesas inùtiles - at decraradu sa fonte ufitziale Ansa - ma finas a como podimus nàrrere chi si nch'at fuidu siat cumbatentes talebanos, siat criminales comunes». S'interventu armadu, e progetadu in cada particulare, l'at rivendicadu Zabihullah Mujahid, su rapresentante chi at ghiadu sa rebellia, dende a ischire fintzas chi s'atacu fiat ammaniadu e coordinadu dae «deghe kamikazes e chi bi nd'at mortu tres». 

Unu responsàbile de sa seguresa afghana at decraradu imbetzes a sos mèdios locales chi sos mortos sunt a su nessi deghe, ma petzi intre sos sordados chi si sunt opostos a s'atacu. 

Su matessi giornalista, chi no at dadu nùmene semper pro chistiones de seguresa, at cunfirmadu a s'Ansa chi sa batàllia pro su controllu de sa presone «est durada tres oras, intre sas 2 e sas 5 de note, ora de su logu».