de Lisandru Beccu
Sa Sèrie B est una categoria
tramposa, b'at semper ite gherrare e si sas partidas non nche las
serras, arriscas de nche lassare in caminu puntos pretziosos. Est una de
sas letziones de importu de su fùbalu e su Casteddu eris l'at tastada,
imparende chi su resurtadu podet mudare finas a s'ùrtimu segundu. Naradu
custu, b'at de ammìtere chi su parègiu cun sa Ternana est unu resurtadu
giustu, ca sa partida est abarrada belle semper echilibrada.
Sa
die est caente, ma non bastat a firmare sos propòsitos bonos de
Falletti, chi proat a pònnere pensamentos a Storari cun una paja de
tiros dae a tesu. Sos ruju-birdes cumintzant bene, atachende sos tretos
lìberos e tirende in porta. A su de 21 minutos, a cajone de unu passàgiu
longu indiritzadu a sos pees de Avenatti, su portieri casteddaju est
custrintu a nch'essire dae s'àrea e a nch'istesiare sa botza cun sa
conca pro l'antitzipare.
Bi proat fintzas Busellato, cun un'ischitzinada
a filu de terra, ma Storari li narat chi nono. A su de 40 minutos,
cando sa partida pariat in manos de sos umbros, unu tiru de Farias
respintu dae unu defensore, nche crompet a sos pees de Sau chi, cun unu
tiru a bolu a su segundu palu, bi nche l'inferchit a Sala. In su segundu
tempus sos sardos parent torrados a nàschere, mèritu de su gol de
s'1-0; difatis sighint a ispìnghere a dae in antis. Su Casteddu andat a
curtzu a su segundu gol cando Dessena intrat in àrea dae su ladus de
dereta, nche brincat duos òmines e nche la ponet in mesu a filu de
terra. Bi crompet Melchiorri a corfu seguru dae pagu tretu, ma su
portieri respinghet sa botza. A su de 53 minutos bi torrat a proare Sau
cun sa conca, ma sa mira no est bona.
Nche colat un'iscuta e sa
Ternana si nch'ischidat, torrende a giogare comente a su cumintzu. Cun
unu tiru retzidu dae su cugione, Gonzalez incorrat sa botza chi andat a
s'iscùdere in su ladus de susu de sa traessa e torrat in manos de
Storari. In sos ùrtimos minutos de giogu sos ruju-birdes sighint a
pressare, andende a curtzu a su gol in una paja de ocasiones, in antis
cun Avenatti e posca cun Furlan.
Su parègiu arribat in sos ùrtimos
minutos de recùperu, cando su Casteddu fiat giai cumbintu de si nche
torrare a Sardigna cun tres puntos. Su gol naschet dae unu tiru lìberu
pro unu fallu de Murru in su ladus de dereta. Sa botza, imbolada a mesu
de s'àera dae Vitale nche crompet a conca de Valjent chi nche
l'indiritzat a su segundu palu e marcat su gol de su parègiu. Duncas unu
puntu a ambas sas iscuadras. Sos ruju-biaitos como sunt in segunda
positzione, a duos puntos dae su Livorno chi at bìnchidu in Como. Sàbadu
chi benit in su Sant'Elia b'at a èssere s'Avellino, ex iscuadra de
Rastelli.
Formatziones
Ternana: Sala,
Vitale, Masi (66' Furlan), Gonzalez, Zanon, Busellato (54' Grossi),
Còppola, Valjent, Falletti (70' Dùgandzic), Avenatti, Ceràvolo.
Allenadore: Domènico Tosscano
Casteddu:
Storari, Murru, Capuano, Salamon, Balzano, Deiola (72' Munari), Di
Gennaro, Dessena, Sau (80' Giannetti), Farias (59' Joao pedro),
Melchiorri.
Allenadore: Màssimo Rastelli
Gol: 40' Sau, 95' Valjent
