de Maurìtziu Sale
 |
| buzzkenya.com |
Ischimus chi su mundu est tundu, ma est prenu
de bicos e de cugiones. E s'òmine a dolu mannu, dae cando nch'at
cumpresu s'importu de su dinare e de sa richesa, los at chircados e
isfrutados belle totus. E in pare cun su logu, in contu de isfrutamentu,
nche colaiant finas sos chi b'istaiant. Comente in sa Repùblica
democràtica de su Congo, pro nàrrere,
logu ricu de carvone minerale e de sa genia allotròpica sua prus
pretziosa: su diamante.
Pedrigheddas chi sunt servidas semper a pònnere s'òmine contra a sos frades suos. Gherras orrorosas tzelebradas a ghisa de ritu divinu, colende subra a totu e a totus, mescamente a gente indifesa e lassende in ue colaiat petzi morte, terrore, maladias e povertade. Sas minas sunt destinadas a si nch'esaurire in presse e duncas sunt medas, tropu finas, sas chi in sos sèculos ant abertu pro nche pòdere collire su tantu bastante a ingendrare richesa. Lassende su logu disestradu cun golleis e gorropos artifitziales ispantosos. Oe in sos cugiones abbandonados sunt contivigende un'àtera genia de richesa, un'aina chi servit semper a pònnere òmines contra a òmines: s'annestru militare de sos pipios.
Paret chi s'annestru siat òpera de
s'Alleàntzia islamista de sas fortzas democràticas (Adf). Unu grustu
eversivu ugandesu, in su tempus coladu finantziadu dae Khartoum, chi
pròpiu in cue, in su ex Zaire, nch'at ammaniadu una base operativa.
Segundu sa testimonia de unos cantos disterrados congolesos in
Bundibugyo (Uganda), in pare cun sos de s'Adf, bi diat àere unos cantos
militzianos chi faeddant s'àrabu e chi atzinnant a s'sipissu a Al
Shabab, cunsideradu unu terrorista de livellu internatzionale. Sa
denùntzia orìginat dae una chirca chi ant fatu sos pìscamos de sa
provìntzia de Bukavo e chi ant ammaniadu un’incartamentu cun
fotografias e testimonias. «In sos primos ses meses de su 2015 -si leghet in su documentu- sos militzianos jihadistas ant massacradu a su nessi 400 tziviles». A coa de su mese de maju sos pìscamos ant dadu duncas s'allarme a totu su mundu, dende a ischire chi «b'aiat unu bobboi mannu suspesu in àeras subra de su Congo orientale» e chi si nche diat èssere illieradu cantu prus in presse, «ingendrende àteros mostros: Genotzìdiu, Integralismu jihadista e unu Protzessu de balcanizatzione».
Sa noa l'at divulgada Maria Lozano, vitze diretore internatzionale de sas comunicatziones pro sa fundatzione pontifìtzia "Agiudu a sa Crèsia chi sufrit" (Acs). Lozano at acraridu chi «su
bonu de sos pipios, intre sos noe e sos bìndighi annos, sunt òrfanos o
puru dados in afidu a sos fundamentalistas dae sas famìlias matessi, cun
su cumbinchimentu chi diant àere retzidu un'istrutzione in Europa, in
Oriente mesanu o in Cànada». Semus chistionende imbetzes de su
subramonte de Ruwenzori, unu de sos prus perigulosos de su mundu in
contu de natura reverde, de padentes iscurigosos e feras de cada genia
chi parent nàschidos pro nche costoire sos segretos prus viles e
afrentosos.
