A pustis de sa derrota de Brèscia e de su parègiu in su Sant'Elia cun su Como, su Casteddu teniat bisòngiu de torrare a mòlere, a giogare e a cùrrere conca a sa Sèrie A comente in su mese coladu. Su Lanciano non si la colat bene in classìfica, est obligadu a bìnchere pro non nche pèrdere su cuntatu cun sas aversàrias chi sunt gherrende pro si sarvare.
Ambas sas iscuadras chircant de si nch'apropiare de sa partida, ma non nche colat tempus meda pro bìdere su primu gol. Farias indiritzat unu passàgiu traessu a s'àrea de penalidade e Tello s'imbentat unu èuro-gol. Su giogadore colombianu nche pesat sas ancas a chelu e cun una bitzicleta nche marcat su vantàgiu. Su Casteddu giogat mègius e est perigulosu cun Munari e Faris, ma Casadei rispondet bene semper. A su de 23 minutos arribat su de duos. Dae su ladus de dereta, Di Gennaro faghet mòvere unu passàgiu traessu indiritzadu a Salamon. Sa botza est perfeta pro sa conca sua, su giogadore paret bolende cando nche l'incorrat a sa dereta de Casadei. Su primu tempus si nche serrat cun paritzas interrutziones e unas cantas ammonitziones. In sa segunda fratzione su giogu non mudat, sos sardos parent prus cumbintos. A su de 15 minutos su pee mànchinu de Pìccolo nch'ismesat s'isvantàgiu. S'atacante, cun unu tiru lìberu de segunda intentzione faghet intrare sa botza a filu de terra in su cugione de su segundu palu sinnende s'1 a 2. Sos òmines de Rastelli non s'iscumponent e nche marcant su de tres. Farias, semper protagonista, òperat unu bellu passàgiu pro Cerri chi, a pagu tretu dae sa lìnia de porta, nche devet petzi imbèrghere sa botza a intro. Sa partida custa borta paret suta controllu de sos sardos. Su Lanciano proat a pònnere pensamentos a Storari una paja de bortas, ma sa defensa e su portieri si faghent agatare prontos. In sos ùrtimos minutos s'àrbitru nche bogat a foras a Di Matteo pro unu fallu perigulosu a Giannetti. Acabbat gasi, 1-3.
Su Casteddu torrat a bìnchere a pustis de duas partidas, ma abarrat ancora a unu puntu dae su Crotone chi est faghende unu campionadu meravigiosu. Apuntamentu a sàbadu in Livornu pro sa de 18 giorronadas e a mèrcuris in Milanu contra a s'Internazionale pro sos otavos de sa Copa Itàlia.
Formatziones
Lanciano: Casadei, Di Matteo, Rigione, Aquilanti, Pucino, Crecco, Paghera, Vàstola (38' Lanini), Pìccolo (75' Marilungo), Padovan (68' Turchi), Di Francesco.
Allenadore: Roberto D'Aversa
Casteddu: Storari, Barreca, Salamon, Ceppitelli, Balzano, Di Gennaro (87' Krajnc), Munari, Giannetti, Tello (60' Deiola), Farias (68' Joao Pedro), Cerri.
Allenadore: Màssimo Rastelli
Gol: 13' Tello, 34' Salamon, 61' Pìccolo, 67' Cerri
Espulsos: 85' Di Matteo
