de Màuru Piredda
 |
| Deretos lìberos. Url imàgine |
A pustis de is resurtados eletorales
frantzesos, su sìndigu casteddaju Màssimu Zedda (in pare cun is collegas
suos Doria e Pisapia) at ammaniadu un'apellu publicadu oe in su
giornale italianu La Repubblica. Indiritzende·si a is partidos de su
tzentru-manca ddis at pedidu de «non lassare campu lìberu a sa dereta populista». Pd e Sel «nche devent barigare is divisiones atuales». Su riferimentu est a sa collocatzione diferente cunforma a su guvernu Renzi, «ma traballamus pro chi custa fase siat unu momentu transitòriu, movende dae is Comunas».
In prus de dare a ischire chi «su sèberu de su candidadu a sìndigu podet èssere fatu petzi movende dae sa valutatzione de su traballu acumpridu»
(e duncas narende chi s'issoro ddu est), Zedda e collegas nch'ant
imbiadu, duncas, unu singiale finamentas a chie in custu periòdu bolet
fraigare una manca autònoma dae su Pd.
A su nessi a livellu
generale. Su segretàriu de Rifondazione Paolo Ferrero, in Casteddu pagas
dies a imoe, at naradu chi su perìgulu de una bìnchida de is populistas
est neghe de «is sotzialistas chi ant agiuadu a Le Pen» cun is polìticas issoro. E chi «su Pd est unu partidu de dereta»
issu puru. Ma Rifondazione no at a nàrrere chi nono a Zedda e no est
nemmancu a tretu de si nch'essire dae sa majoria regionale chi sustenet a
Pigliaru.
Est a nàrrere, a manca is àeras sunt semper prus
annuadas. A un'ala is chi narant chi nono a Renzi (ca Renzi etotu narat
chi nono a un'idea de guvernu cun valores de manca) ma sighint a èssere
ligados a su Pd a livellu locale; a s'àtera is chi movent dae su livellu
locale torrare a bisare cambas de olia. Podet èssere, tando, chi siat
custu su chi firmat su progetu "Sinistra italiana" e non is chistiones
organizativas in contu de su sugetu nou (chie bolet unu partidu, chie
una federatzione de siglas).
