 |
| Deretos TheDailyBeast, Url imàgine |
Sighint a aumentare sos mortos de su cunflitu yemenita, su raportu de s'Onu narat 32mìgia. Intre custos b'at 5.700 tziviles, pessones chi non b'intraiant nudda, pòberos, innotzentes. 850 intre fèminas e pitzinnos. Unu totale de 8.875 violatziones de sos deretos umanos, 43 cada die. Sunt custos sos datos de sa gherra intre sa coalitzione àraba (apogiada dae sos Istados unidos) e su Yemen. Sa situatzione a livellu de servìtzios primàrgios si nch'est fata grae meda. 14 milliones de pessones non podent atzèdere a s'assistèntzia sanitària, 19 milliones de pessones no tenent s'abba potàbile e 21 milliones (s'80% de sa populatzione) tenet bisòngiu de sas curas umanitàrias.
Su coordinadore umanitàriu de sas Natziones unidas, Johannes Van der Klaauw, at naradu chi - “Giai in antis de sa gherra, cumintzada su 26 de Martzu, b'aiat 16 milliones de pessones chi aiant bisòngiu de assistèntzia umanitària a cajone de: povertade, suta isvilupu, degradu ambientale e debilesa istatale”. Sa crisi atuale at atripiadu sas comunidades prus dèbiles e at peoradu sos agiudos umanitàrios a cajone de unu disinteressamentu totale a sa vida umana, cun atacos indiscriminados a sos tziviles e a sas istruturas tziviles.
Pro seguru b'at una violatzione de sos deretos umanos e tocat a sa comunidade internatzionale a intervènnere firmende custa gherra pro nche bogare a pìgiu sas resones fungudas chi l'ant ingendrada e pro nche cròmpere a una solutzione polìtica.
In s'ìnteri, in Sardigna, su comitadu de s'assemblea generale de Santa Justa, at cunfirmadu chi su 19 de custu mese b'at àere una manifestatzione in Domusnovas. Su corteu at a mòvere dae su campu isportivu, pro nche cròmpere a dae in antis de sa Rwm italia munitions, sa fàbrica chi produet sas matessi bombas impreadas in su cunflitu yemenita.
