Est cumintzadu eris, cun sa vitòria de Sebastian Vettel, in Austràlia, su Campionadu mundiale de Fòrmula 1. S'istajone 2018 (21 garas) at introduidu paritzas novidades de importu mescamente in contu de tecnologia.
Pro cumintzare dae sas iscuadras, b'at de nàrrere chi sa noa printzipale pertocat s'Alfa Romeo. Su màrchiu italianu dae ocannu at a bestire sas livreas de sa Sauber pro more de un'acordu cummertziale e tècnicu. Sa Mclaren, imbetzes, at renuntziadu a sos motores Honda in càmbiu de sos Renault. S'imbesse at fatu sa Toro Rosso chi, pro tres annos, at a giùghere motores nipònicos.
Sas novidades tecnològicas, imbetzes, pertocant s'aerodinàmica, sa seguresa e sas gommas. Dae ocannu non faghet prus a impreare sos suplementos aerodinàmicos in su còfanu motore e in s'aletone de segus.
Pro amparare sos pilotas est arribadu Halo: un'istafa de titàniu, saldada a sa vetura, chi inghìriat sa conca de chie ghiat. Sas simulatziones de sa Fia ant cunfirmadu chi su sistema de amparu at crèschidu de su 17% su tassu de subravivèntzia de su pilota.
Sa Pirelli at introduidu àteras duas genias de gommas cun sa punna de valorizare s'ispetàculu e sas istrategias de sa cursa. A sas sete gommas chi esistiant giai (Abba, Intermèdias, Tostas, Mèdias, Moddes, Super moddes, Ultra moddes) si nche nd'at agiuntu àteras duas (Super tostas e Iper moddes).
