Eletziones italianas e eletziones regionales. In s'arresonu polìticu sardu non podimus partzire sas primas dae sas segundas. Manca, dereta, etno-regionalistas (cunforma a sas categorias de sa sièntzia polìtica): non b'at partidu o movimentu polìticu chi no apat bidu su votu de su 4 de martzu comente una propedèusi a sa cramada de su 2019.
Sas abbas non sunt chietas pro su Pd, su partidu printzipale de sa coalitzione chi guvernat sa Ras. In prus de sas crònacas, est pretzisu a lèghere su cummentu de Emilianu Deiana, presidente de s'Anci Sardigna. Pro su sìndigu bultiggjatesu, su partidu devet torrare in mesu a sa gente. «Tocat - narat - de nche pònnere sos pees in su ludu de sas periferias sena tìmere de s'imbrutare sas Hogan». E, in prus, s'autore de "Bar sport democratico", faeddat de Pd sardu ca nât chi diferentes sunt sos interessos dae sos de su Pd italianu: «trasportos, energia, servitudes militares, agricultura, fiscu».
Pro como unu Pds giai lu tenimus, su de Maninchedda. S'ex assessore regionale de sos Traballos pùblicos si nch'est essidu dae sa Giunta Pigliaru dae una deghina de meses e, a pustis b'àere proadu cun sos de Cucca, si nch'est istesiadu dae sas eletziones polìticas proponende finamentas s'obietzione de cussèntzia de sos sardos (est a nàrrere s'astensione). S'arresonu suo non diat èssere diferente meda dae su de Deiana a dae chi proponet una «polìtica natzionale sarda». Ma oramai paret abbandonada s'Opa pro ghiare una coalitzione (sa chi bincheit su 2013) chi nemmancu esistet prus.
A s'ala de dereta s'Opa paret chi imbetzes potzat mòvere dae su Psd'Az chi, in custu giru, at renuntziadu a su sìmbulu. B'at chie narat chi sa pertzentuale sarda de sa Lega siat de màdrighe sardista. E b'at àtere chi faeddat de votos xenòfobos chi creschent finamentas in custa terra. Su chi contat est chi sos sardistas faeddant de resurtu istòricu, chi nche torrant a Roma e chi su sìmbulu issoro, pro sas regionales, lu cherent impreare. Su progetu aviadu? «Si at a èssere profetosu pro sos sardos - narat Solinas -, perunu impèigu bido pro su benidore. Ma nd'amus a faeddare in su de 34 cungressos de su partidu». Chi forsis, a tando, at a èssere epuradu dae sas boghes crìticas.
Nudda galu ischimus de àteras formatziones, comente La Base e Unidos, chi ant brincadu s'apuntamentu de su 4 de martzu.
E de su carrabusu ite ischimus? Chi su 20% nch'est a tesu finamentas contende s'algorìtmicu 7,5% mentovadu da Giuanne Frantziscu Sollai (su càrculu in su profilu Fb suo). Cunforma a custu resurtu negativu (àtera punna decrarada fiat finamentas sa de bìnchere carchi cullègiu uninominale) duas sunt sas allegas: sa de chie narat chi 20mìgia votos sunt cosa bona cunforma a unos cantos fatores (de tempìstica e mediàticos); sa de chie narat chi su protzessu non fiat inclusivu ma eletoralìsticu e vertitzìsticu.
Tocat de bìdere comente s'at a isvilupare su protzessu agregativu issoro cunsiderende tres fatores: su radicamentu territoriale chi nât chi ant a impuntzare; sas àteras camineras de sas siglas chi no ant aderidu a custu progetu; sas prospetivas de crèschida o mancu de su M5s cunforma a sos isvilupos de sa polìtica italiana.
