de Màuru Piredda
«Una lista internazionalista, chi si pighet
s'interessu generale de su movimentu operaju internatzionale, in foras
de (e contra a) cada forma di sovranismu; chi gherret pro sos deretos de
autodeterminatzione de cada natzionalidade oprimida; chi punnet a sa
prospetiva de s'unificatzione de s'Europa pro mèdiu de una federatzione
de istados sotzialistas». Est su
chi narant su Pcl (Partidu comunista de sos traballadores) e Scr
(Sinistra, classe, rivolutzione), formatziones de màdrighe trotskista
chi ant presentadu, pagas dies a oe, sa lista issoro pro sas eletziones
polìticas italianas imbenientes. Semper chi regollant sas 50mìgia firmas
prevìdidas dae sa lege eletorale.
Ambas duas formatziones aiant manifestadu su sustegnu issoro a sa cramada referendària catalana de su primu de santugaine.
Custu est su chi aìamus iscritu in un’artìculu betzu.
Su Partito comunista dei lavoratori, mancari sa cundenna a sas polìticas de su guvernu catalanu e sa crìtica a sa Cup (ca nât chi «votat sas leges de austeridade comente faghiat Rifondazione cun su guvernu Prodi»), pedit una «egemonia de classe anticapitalista in intro de su movimentu de massa indipendentista» pro nche cròmpere a una repùblica sotzialista e pro cumintzare sa rivolutzione in totu s’istadu: «Su proletariadu catalanu – at naradu Marco Ferrando – est dae semper s’avanguàrdia de su proletariadu ispagnolu».[...]
Su dualismu de poderios est sa crae de custa àrea polìtica. «S’ùnicu caminu chi cheret sighidu – custos sos faeddos de Sinistra classe rivoluzione, (Revolució in Catalugna) – est sa difusione de sos comitados de defensa de su referendum in cada bighinadu, iscola, universidade e logu de traballu. Custos comitados diant dèvere èssere cullegados a livellu locale e natzionale pro mèdiu de rapresentantes eletos». Sa punna? Una «assemblea natzionale chi rapresentet su pòpulu catalanu». Pro custa formatzione «sa pràtica de su deretu de autodeterminatzione tenet efetos rivolutzionàrios e si podet otènnere petzi cun una cunduta rivolutzionària. Pro bi cròmpere non giuat a si fidare de sos natzionalistas burghesos catalanos».
