“Potere al popolo” naschet su 18 de
santandria a pustis de s’annullamentu de s’assemblea cunvocada dae Anna
Falcone e Tomaso Montanari. Sos de su tzentru sotziale napoletanu “Je
so’ pazzo” (un’ex Opg ocupadu) ant disinnadu, tando, de
s’auto-rapresentare movende conca a una coalitzione a manca de su Pd. Sa
de tres, pro como, si contamus “Liberi e uguali” de
Pietro Grasso (cun in intro Mdp, Sinistra italiana e Possibile) e “Per
una sinistra rivoluzionaria”. In pare cun “Je so’ pazzo” b’agatamus
finamentas a Sinistra anticapitalista e Rifondazione comunista.
In su
manifestu issoro si faeddat de “autodeterminatzione de sos pòpulos” ma
non de natzionalidades oprimidas. Possìbile chi, duncas, siat unu
cuntzetu ligadu a sa soberania de sos istados cunforma a su domìniu de
s’austeridade europea. In su primu puntu de su programma s’atuatzione
prena de sa Costitutzione «e de sos puntos sos prus progressistas».
Costitutzione chi, in prus de sa sovranidade «che appartiene al popolo»,
faeddat de repùblica italiana ùnica e indivisìbile. Pro su chi pertocat
sa Catalugna aìamus giai bidu sas positziones de Prc e de Sa:
favorèvoles a sa repùblica noa sos de Turigliatto; positzione
federalista sa de s’ex partidu de Bertinotti.
