de Màuru Piredda
Duos sunt sos protzessos chi prenant sas
allegas de custas dies. Unu, resurtu de annos e annos de batallas, est
su de s’autodeterminatzione catalana. S’àteru est su chi pertocat sa
manca italiana a dae chi unos cantos cummentos de su bonu de sos
opinionistas de domo nostra puntant su pòddighe contra a cussa
àrea polìtica pretzisa. Calicunu non b’at pensadu duas bias a nche la pònnere in
sa guarnissa de su franchismu e de su falangismu comente chi esseret in
favore de su manganellu de sa Guardia civil. Bidemus cale sunt sas
positziones de s’universu chi, a pustis de sa Bolognina, si nch’est
postu a manca de su Pds e chi infines s’est partzidu dae Rifondazione
comunista (nàschida gràtzias a sos chi non cheriant isòrvere su Pci, a
Dp e a àteros grupos).
Cumintzemus dae Rifondazione. Sa lìnia
polìtica de su partidu chi fiat de Bertinotti est pagu prus o mancu sa
matessi de su tandem Izquierda unida/Podemos. Est a nàrrere
“eurocomunismu”, federalismu, republicanèsimu (in intro de su cuadru
capitalìsticu de reformare a corfos de Keynes) e una pagu crara visione
de su deretu a s’autodeterminatzione. Podemos faeddat de s’Ispagna
comente “natzione de natziones”, chi non cheret nàrrere nudda, e in sas
dies coladas at connotu una dialètica de importu cun Podem Catalunya.
Izquierda unida, cundendennde sa repressione de su guvernu ispagnolu at sighidu a
mentovare sa netzessidade de unu referendum cuncordadu. Nointamen
s’ausèntzia de una positzione favorevole a s’indipendèntzia, su Prc at
semper e cando cundennadu su ruolu de s’Ispagna. «Sa sìndiga de
Barcelona Ada Colau Ballano – at naradu su segretàriu Maurizio Acerbo -
no est indipendentista comente no lu sunt Unidos Podemos e Catalunya En
comu. Ma pedit sas dimissiones de su presidente Rajoy responsàbile de sa
repressione. Sa manca radicale, federalista e republicana, erede de sa
cumbata contra a sa ditatura franchista defensat sa democratzia».
Positzione federalista e republicana finamentas sa de su Pci, est a
nàrrere sos comunistas italianos chi ant torradu a bogare a campu su
sìmbulu de Guttuso. Ma chi bidet petzi una cara de su protzessu
catalanu, sa burghesa. Fosco Giannini – responsàbile afàrios èsteros e
serente a una visione “antimperialista” chi punnat a inglobare sos Brics
in cussu fronte – faeddat de «referendum de màdrighe natzionalista» e de
«egoismu de unu sugetu prus ricu contra a sas populatziones sas prus
pòberas». Su resurtu, pro Giannini, diat èssere petzi su de sa
«partzidura de su movimentu operaju». Perunu faeddu, in su situ issoro,
de s’isciòperu generale e de sas paràulas de òrdine de sa repùblica
catalana de sos traballadores. Perunu faeddu subra de sa partzidura chi
est interessende sa burghesia catalana. Cundenna, finamentas dae parte
issoro, de sa repressione de Madrid.
Protagonismu de sa classe burghesa ebbia finamentas pro Marco Rizzo de su Partito comunista. «No est sa classe operaja – nât chi – su motore de custu separatismu, ma sas classes burghesas. Est un’iscontru intre burghesias, intre sa catalana e sa tzentralista». Su Pc de Rizzo est ligadu a su Partido comunista de los pueblos de España, e duncas a su Partit comunista del poble de Catalunya, organizatzione chi, comente su Kke (Partidu comunista gregu) in su referendum de s'Oxi, at promòvidu su “vot nul”.
A favore de su cramada referendària sos grupos trotskistas chi nche fiant in intro de su Prc.
Su Partito comunista dei lavoratori, mancari sa cundenna a sas polìticas de su guvernu catalanu e sa crìtica a sa Cup (ca nât chi «votat sas leges de austeridade comente faghiat Rifondazione cun su guvernu Prodi»), pedit una «egemonia de classe anticapitalista in intro de su movimentu de massa indipendentista» pro nche cròmpere a una repùblica sotzialista e pro cumintzare sa rivolutzione in totu s’istadu: «Su proletariadu catalanu – at naradu Marco Ferrando – est dae semper s’avanguàrdia de su proletariadu ispagnolu».
Afiliadu a sa Corrent roig est su Partito di Alternativa comunista: «Non giuat, comente faghet su partidu de Puigdemont, a nàrrere chi b’at a èssere su referendum "costet su chi costet", cando chi in Saragoza firmat su manifestu pro unu "referendum cuncordadu". Non giuat a proclamare chi "nch’amus a cròmpere a sa punna" e a pustis chi "s'indipendèntzia unilaterale no est in su programma nostru". Non b’at a èssere Repùblica catalana si sos traballadores e sas massas populares no l’ant a impònnere in sas pratzas, cun sa mobilitatzione permanente, cun s’isciòperu generale e s’autodefensa».
Su dualismu de poderios est sa crae de custa àrea polìtica. «S’ùnicu caminu chi cheret sighidu – custos sos faeddos de Sinistra classe rivoluzione, (Lluita de classes in Catalugna) – est sa difusione de sos comitados de defensa de su referendum in cada bighinadu, iscola, universidade e logu de traballu. Custos comitados diant dèvere èssere cullegados a livellu locale e natzionale pro mèdiu de rapresentantes eletos». Sa punna? Una «assemblea natzionale chi rapresentet su pòpulu catalanu». Pro custa formatzione «sa pràtica de su deretu de autodeterminatzione tenet efetos rivolutzionàrios e si podet otènnere petzi cun una cunduta rivolutzionària. Pro bi cròmpere non giuat a si fidare de sos natzionalistas burghesos catalanos». Comente a nàrrere chi Puigdemont at a capitulare comente a Tzipras.
Sinistra anticapitalista de Franco Turigliatto est imbetzes ligada a sos Anticapitalistas de Podemos e a sa de bator Internatzionales de Ernest Mandel e Livio Maitan. Pro issos sa cramada referendària fiat «legìtima, ca fiat sustènnida dae su pòpulu catalanu. Pòpulu chi cheret praticare su deretu a disinnare, finamentas andende contra a sa legalidade ingiusta e repressiva de su regime». Cunfirmadu s’apellu a sa solidariedade internatzionale in cada paisu.
Pcl, Scr e Sa sunt traballende pro unu fronte comune anticapitalista conca a sas eletziones polìticas imbenientes.
Sa prus serrada, cara a su protzessu, paret sa positzione de Sinistra italiana chi faeddat – tràmite su responsàbile èsteros Erasmo Palazzotto – de «irresponsabilidade» finamentas dae parte de chie at impreadu s’istrumentu referendàriu «pro partzire su pòpulu catalanu imbetzes de lu unire».
Custu est su cuadru de sa manca polìtica italiana chi at a pedire su votu finamentas a sos tzitadinos e a sas tzitadinas sardas. Como, semper e cando, tocat de tènnere sa mirada conca a sa manca catalana e ibèrica e a sos iscenàrios chi si sunt aberende.
