 |
| Deretos Reuters |
Cun duos corfos de manu su Presidente nou de sos Istados unidos at dadu cumintzu a sos progetos pro su fràigu de sos oleodotos Dakota Access e Keistone Xl. «Dae como in susu, in sos Istados unidos amus a sighire a fraigare condutos...comente amus semper fatu in su tempus coladu» at naradu Donald Trump.
Sas reatziones dae banda de sos americanos nadios e de sos movimentos pro s'amparu de s'ambiente sunt arribadas deretu. «Nois custa infrastrutura la connoschimus bene e ischimus fintzas chi su guvernu at deviadu s'oleodotu conca a sa natzione nostra sena nemmancu nos pregontare su cunsensu» ant naradu sos Sioux in un'intervista a Reuters.
In sos meses colados prus de 200 tribù aiant dadu su sustegnu issoro a sa protesta contra a s'òpera istratègica. In pare cun issos, in s'ùrtimu perìodu, bi fiant fintzas sos militares veteranos chi ant ghetadu una manu de agiudu e de solidariedade.
B'at chie sustenet chi su sèberu de Trump siat ligadu a su fatu chi sa ETP (Energy Transfer Partners), sotziedade chi est isvilupende su progetu de s'infrastrutura, apat donadu 100mìgia èuros a sa campagna eletorale de su Presidente, ma Donald Trump at negadu cale si siat interessu finantziàriu.
Pro sas dies imbenientes si prevident àteras protestas chi ant a pesare prus de carchi dògia a s'iscuadra de guvernu. A bìdere istemus si su presidente nou at a chircare una mediatzione impreende sas formas democràticas de arresonu o si – comente at promissu – at a operare a pùngiu serradu.
