Sos rapresentantes de sos istados chi faghent parte de s'Organizatzione de sos paisos esportadores de petròliu si sunt imbènnidos in Vienna pro cuntratare sa mèngua de produtzione. Su presidente de s'organizatzione, Mohammed Saleh Al Sada, at annuntziadu chi, dae sa prima die de su 2017, sa produtzione at a minimare de 1,2 milliones de barile sa die. In cabudanni sos istados nche fiant giai cròmpidos a un'acordu pro menguare sa produtzione de 700mìgia bariles sa die.
A pustis de àere annuntziadu sa noa, su preju de su Brent si nch'est artziadu deretu de su 10%, barighende·nche sa cuota de 50 dòllaros a barile.
In sos ùrtimos annos su preju de su petròliu nche fiat caladu meda a cajone de sa detzisione istratègica de s'Aràbia Saudita chi cheriat fàghere resurtare pagu produtivos sos investimentos de sos Iua in s'estratzione cun su sistema de fraturatzione idràulica. Faina in ue si molet sa pedra razola bituminosa (in inglesu Shale e in italianu Scisto. Genia de pedra metamòrfica a pìgias nda) e dae ue si nche bogant su petròliu e àteros minerales.
