Su de bator turnos de Copa Itàlia nos donat, intre sos àteros, su disafiu intre de sa Sampdoria contra a su Casteddu. Sos giogadores de Marco Giampaolo, tres meses a como, nch'aiant barigadu su turnu contra a su Bassano pro tres gol a zeru. Sos de Rastelli, imbetzes, aiant bìnchidu 5-1 contra a sa Spal.
Ambos sos allenadores ischierant paritzas riservas. Sa Copa Itàlia, mescamente in sos ùrtimos annos, est semper istada una vetrina pro chie giogat pagu in campionadu. De signalare s'esòrdiu de Andria Mastino intre sos titulares, Su pradu de domo favorit sos lìgures chi cumintzant cun unu ritmu bonu. A su de 14 minutos arribat su vantàgiu de Alvarez. Su giogadore argentinu, dae su ladus de dereta, resurtat a si nch'atzentrare e a nche collocare sa botza in su segundu palu cun unu mànchinu a filu de terra. Pro su giogadore, ocannu, est su primu gol. Su Casteddu si nch'acòstiat una paja de bortas a sa porta de Puggioni, ma sos tiros de Giannetti no ant resurtu perunu. Su primu tempus si serrat sena àteros corfos e sena recùperu.
Su segundu tempus mudat in bonu. Su ritmu, difatis, creschet agigu. Budimir a su de 50 minutos chircat de raddopiare su resurtadu, ma Rafael rispondet bene. Chimbe minutos a pustis est Giannetti a nche cròmpere cara a Puggioni, ma su tiru, in realidade, est unu passàgiu pagu pretzisu chi si nche morit addae de sa lìnia de fundu. Budimir bi torrat a proare a su de 61 minutos, ma su corfu de conca, fintzas custa borta, est respintu dae su portieri ruju-biaitu. A su de 66 minutos s'àrea casteddaja, prena de gente permitit a Fernandes e a Schick de pòdere raddopiare, ma b'at tropu confusione e sa defensa tzàpulat sa situatzione. Fintzas sos òmines de Rastelli proant a si fàghere bìdere cun Melchiorri, ma su tiru suo no est pretzisu. Colat pagu tempus e arribat su raddòpiu de sos genovesos gràtzias a unu contratacu de Fernandes chi, cun unu passàgiu longu, nche ponet a Schick cara a sa porta de Rafael. S'atacante non faddit e nche marcat su 2-0. Su Casteddu, a pagu prus o mancu deghe minutos dae s'acabbu, nd'aprofitat pro fàghere crèschere su nùmeru de sos giogadores sardos in campu. Intrant Robertu Biancu e Fidelicu Serra. In sos ùrtimos minutos b'at galu tempus pro un'àteru gol. Est Schick a serrare sos giogos cun sa de tres.
Acabbat s'aventura de sos casteddajos in Copa Itàlia, ma a su nessi b'at àere prus tempus pro si dedicare a sas partidas de campionadu.
Formatziones
Sampdoria: Puggioni, Regini (76' Krajnc), Palombo, Eramo, Dodo, Linetty, Cigarini, Djuricic (73' Praet), Alvarez (58' Fernandes), Schick, Budimir.
Allenadore: Marco Giampaolo
Casteddu: Rafael, Mastino (51' Oliveira), Briukhov (77' Biancu), Salamon, Dessena, Antonini Lui, Di Gennaro (77' Serra), Munari, Barella, Melchiorri, Giannetti.
Allenadore: Massimo Rastelli
Gol: 14' Alvarez, 72' Schick, 90' Schick
