 |
| Deretos Getty. Url imàgine |
S'espulsione de 35 funtzionàrios russos operantes in sos Istados unidos, acusados dae s'amministratzione Obama de àere interferidu in sas eletziones presidentziales de s'atòngiu, nch'est colada in sos mèdios de informatzione comente una torrada a sas cuntierras de sa gherra frita. «Apo emìtidu un'òrdine esecutivu – sunt sos faeddos de su presidente publicados eris in su situ de sa Domo arva – chi previdet autoridade prus manna pro rispòndere a unas cantas atziones informàticas». «Santzionados» finamentas su Gru (servìtziu de informatziones pro sas fortzas armadas russas) e su Fsb (erede de su Kgb). «Custas atziones – at annantu Obama – non sunt sa risposta definitiva a sas atividades agressivas de sa Rùssia. Amus a sighire cun àteras atziones seberende cando e in ue, ma unas cantas no las amus a publitzizare».
Putin, pro parte sua, at nâdu chi no at a falare a su livellu de una «diplomatzia irresponsàbile». Prus de una boghe narat chi sa tàtica de su de 44 presidentes Iua est sa de nch'insertare unu contone in su mecanismu de sa transitzione conca a su cuadriènniu Trump. Su Wall Street Journal faeddat de «impèigu nou e prus mannu» pro “su Donald” chi, a inghìriu de sa chistione at decraradu, mancari annanghende chi «est tempus de pensare a cosas mègius», de si chèrrere «oviare cun sas ghias de sos servìtzios». Su bisu isolatzionista de s'Amèrica podet èssere chi siat duncas semper prus neulosu, finamentas ca sa Rùssia no at a pòdere bajulare una cuntierra semper prus manna intre Iua e Tzina. At a èssere difìtzile chi si repitat, a s'imbesse, s'iscenàriu Nixon-Kissingerianu de sos annos '70, cando sa distensione intre Washington e Pechinu fia in funtzione anti-soviètica.
