 |
| Deretos Moju Manuli, gràfica Bakis Mùrgia. «A Moju Manuli e a totu sos chi sunt galu gherrende pro unu bìculu de umanidade reconnota». |
Annu betzu, est tempus de...
...resocontos consuntivos e bilantzos preventivos. Sos primos si nche papant sos segundos e custos ant a èssere fortunados si sos primos fiant onestos;
...giudìtzios sena pregiuditziales pro sos diversamente onestos, ca lis dìamus dèvere cuntzèdere sa proa de sa sìndria;
...prus Magna Carta e prus pagu magna magna;
...prus Istadu Sotziale e prus pagu istados asotziales in sos sitos sotziales;
...una lege eletorale cun sas preferèntzias e mancari sena prefeRenzi;
...mentovare intre sos crìmines contra a s’umanidade su Parègiu di bilantzu e… chie si siat lu pedat, lu votet, lu defenset o finas chie si nd’afutat ebbia, siat duncas cunsideradu unu criminale.
...rèdditu e dignidade de tzitadinàntzia e - a chie si siat chèrgiat cosa in prus - non solu sa libertade de si la fàghere, ma fintzas s’òbligu;
...prus ambiente e prus pagu animales ambientalistas;
...prus animales e prus pagu gurtùrgios agutiperados sena fundu, sena fundaghe e sena istampu de essida;
...prus comunidades, prus territorialidade e prus pagu o nudda regiones e mesches prus pagu mìnimos mùltiplos comunos;
...prus pagu dinare pro Abbanoa e prus dinare pro un'abba neta o totu a su prus, pro un’abba gassa;
...prus pagu Ecuitalia e un’Itàlia prus ècua e elicoidale pronta a su decollu e no a su degollu;
...nche destituire a Gentiloni e a Napolitano (pardon, a Mattarella) sena chi pro custu nos devat bisongiare sa lege Basàglia;
...aturdire a Grillo e torrare·bi·lu a sos grillinos in un’istèrgiu de còghere in pare cun Salvini;
...prus messàgios sublinguales o subinguinales, ca de subliminales nche nde tenimus sas prunas prenas;
...umanèsimu onìricu e non de onorevoles onanistas;
...nche li leare su triutu dae manos a Rastelli e torrare·bi·lu a Poseidone o - in càmbiu – a sa Maserati;
...nche li secuestrare su Passa-Portu-Francu a s’abogadu Scifo e catzare·nche a Randaccio dae s’àrbore maistru; dae como in susu marcare·los a òmine, non prus a Zona;
...nche torrare sos giornalistas beros a su traballu in logu de giornale e de nche tancare sos farsos in regime de 41bis cun deretu de prelatzione pro unos cantos pentidos che a Feltri, Scanzi o Travaglio;
...prus malos disordinados e non prus Montes Pàschinos o bonos ordinàrios e CCT. Salude!
...prus Sardos surdos a sas lusingas soridas e prus losangas sardas a sabore de nughe e de pabassa;
...Augùrios. Chi s’annu nou siat pro totus - a disìgiu de cadaunu - un’annu mègius de s’antepostu e peus de s’imbeniente.
...un’annu mègius de su Pendolinu, de su treninu birde o mìgliu fiat?, de su mìgliu terrestre, de su mìgliu nàuticu, de sas milli mìgias, de sas milli e una note, de sas notes sena sonu e sena sonnu. De sa ASL ùnica e de sos patimentos vàrgios. Chi siat, dae sa base, un’annu sena prus bases militares, sena artària, sena catetos e sena ipotenusas. Prus chircos e prus pagu cuadrados, prus cuadros e prus pagu guarnissas, prus cubas e prus pagu cabos, prus culumbas e prus pagu tulumbas. De tèssere e de merèssere, de benèssere e no ingramèssere pane. Sena pena o cun prus punnas e prus pagu pilu a banda de intro o a banda de foras de s’ou, ma cun prus disìgios cuncramados e reales!
In finitias est tempus de... Bonos Annos !
