 |
| Deretos Chris McGrath/Getty Images URL imàgine |
Sena torrare in segus tempus meda e biagende a s’imbesse in intro a su trùbulu turcu balet a mentovare unas cantas datas de importu. Datas o mègius sumanas chi, mancari in pessu in intro a unu calendàriu ebbia, ant marcadu a fogu su caminu conca a sa democratzia in unu paisu chi – sena duda e sena timòria – si podet definire fascista. E de sa peus rèpula. Su mese de Santandria de su 2016, sa note intre su tres e su bator, sa politzia turca nch’at messadu dae su laore polìticu, trèighi parlamentares de su Partidu democràticu de sos Pòpulos (Hdp) chistende·nche·los a presone. Acusa? Soversione e terrorismu. Su mese de Maju de su 2016, Erdoğan nche catzat s’istitutu de s’immunidade parlamentare, isterrende·si gasi su logu pro sos arrestos imbenientes chi nche fiant giai in intro a su progetu presidentziale suo. Resones? Luta a sa soversione e a su terrorismu. Su bìndighi de Trìulas de su 2015 cun sa proclamatzione de s’istadu de emergèntzia a cajone de unu golpe atrividu (e/o presuntu?) nche l’agabbant in galera prus de otantamìgia persones. Acusas? Soversione e terrorismu.
Su prus sunt acadèmicos, giornalistas, attivistas e esponentes de sa sotziedade tzivile, sos chi nche ruent a intro de sa pradera guvernativa. Prima die de Santandria de su 2015 e su sete de Làmpadas de su 2015, Erdoğan non bi reventit a nche serrare in foras dae su parlamentu su Hdp, fintzas giughende·nche – sena birgòngia peruna e cun un'ingiùrgia manna a sa democratzia – a su 10% s’isbarramentu eletorale. Rapresentàntzia populare derruta, sestu programàticu e polìticu conca a sa ditadura, poderes legislativos, esecutivos e giuditziàrios in manos a un’òmine ebbia.
Custu est su chi si nche lughet leghende su comunicadu de sa Rete Kurdistan Sardigna, publicadu in manifestosardo.org. Comunicadu chi serrat cun sos faeddos de Selahattin Demirtaş, su co-presidente de su Hdp: «Sa pelea nostra conca a sa paghe, a sa giustìtzia e a sa democratzia pro su pòpulu nostru at a sighire sena pasu. Semper e in cada logu».
Finas si oe, galu, Turchia non pesat rima cun Democratzia, mancu retroghende.
