In sa trasferta piemontesa su Casteddu cunfirmat de àere sa peus defensa de su campionadu retzende chimbe gol dae su Torino. In s'ìnteri unos cantos tifosos ant cumintzadu a cuntestare s'allenadore Rastelli, pedende chi sa sotziedade nche lu catzet.
Su granados in duos minutos de giogu andant deretu a su bersàlliu cun Belotti. Valdifiori, frantu in dae segus, òperat unu bellu passàgiu filtrante artu pro s'atacante lombardu chi non bi pensat duas bortas e tirat a bolu. Storari respinghet comente podet, ma sa botza nche torrat a sas farrancas de Belotti chi nche l'ispinghet a intro. Su de duos arribat a pustis de noe minutos. Su Casteddu perdet sa botza in zona arta e su Torinu movet in contratacu. Ljajic dae su ladus de manca s'assètiat sa botza in su pee destru e tirat a porta. Storari, traitu dae sa trajettòria, faddit s'interventu e incassat su de duos. A su de 36 minutos sos sardos andant a curtzu a su gol, ma Hart parat in duos tempos in sa lìnia. Duos minutos a pustis su Torino ismànniat su vantàgiu suo. Sa defensa sarda perdet sa botza in sos 30 metros. Bi pensat Baselli a la recuperare passende·la a Benassi chi, cun unu destru pretzisu, nche l'istichit in su segundu palu. Su Casteddu chircat sa reatzione e a su de 41 minutos nche crompet a su gol. Pisacane dae su ladus de manca s'imbentat unu passàgiu traessu pro sa conca de Melchiorri. S'atacante non faddit su corfu e nche marcat su gol de sa bandera. Sas iscuadras si nche rrtirant a s'ispogiadòrgiu cun su partziale de 3-1.
In su segundu tempus sa situatzione non mudat. Su Torino giogat e andat a curtzu a su gol in prus de un'ocasione. A su de 51 minutos, torra cun Baselli, cuncretizat su traballu prodùidu marchende·nche su de bator dae intro de s'àrea. Non nche colant nemmancu deghe minutos chi s'àrbitru li cuntzedet fintzas unu tiru de penalidade a sos piemontesos. Tachtsidis aterrat a Belotti in intro de s'àrea. Pro non si fàghere mancare nudda sos sardos abarrant fintzas in deghe. Dessena devet lassare su terrinu de giogu pro cunduta anti-isportiva e pro protestas. De sa punitzione màssima, imbetzes, si nde òcupat semper s'atacante lombardu chi non faddit e nche marcat su de chimbe. Sa partida dae como in susu si nch'indòrmigat agigu. B'at carchi ocasione pro sos granados e pro sos ruju-biaitos, ma su resurtadu oramai est blocadu in su 5-1. Acabbat gasi.
Formatziones
Torino: Hart, Barreca, Castan, Rossettini, Zappacosta, Baselli (62' Obi), Valdifiori, Benassi, Ljajic (70' Martinez), Belotti (76' Lopez), Falque.
Allenadore: Sinisa Mihajlovic
Casteddu: Storari, Pisacane, Ceppitelli, Bruno Alves, Isla, Tachtsidis, Dessena, Munari, Sau (60' Padoin), Borriello (56' Farias), Melchiorri (73' Giannetti).
Allenadore: Massimo Rastelli
Gol: 2' Belotti, 11' Ljajic, 38' Benassi, 41' Melchiorri, 51' Baselli, 59' Belotti (p)
Espulsos: 58' Dessena
