A pustis de 14 dies sa Sèrie A torrat a imbucare cun s'antìtzipu intre Chievo e Casteddu. Sos ruju-biaitos arribant dae sa derrota de 5-1 contra a su Torino e sos veronesos dae su disafiu pèrdidu 2-1 cun sa Juventus.
Sos ritmos de su primu tempus sunt lestros e ambas sas iscuadras si disafiant a conca arta. Sos grogos de su presidente Campedelli nche perdent deretu a Floro Flores pro infortùniu, in càmbiu intrat Meggiorini. Su Casteddu faghet possessu cun sa botza, ma non resurtat a nche cròmpere a sa porta de Sorrentino. Pellissier, in sos ùrtimos minutos de su primu tempus, at una bella ocasione pro nche marcare su vantàgiu, ma su corfu cun sa conca nch'essit a foras.
In su segundu tempus arribat su vantàgiu de sos vènetos. S'autore est un'ex: Massimo Gobbi. Su tzentrocampista de su Chievo cuncàmbiat sa botza cun Castro in unu bellu triàngulu e cun su pee mànchinu nche l'ispinghet a intro de sa porta. Fiat dae 100 partidas chi su giogadore de Milanu non signaiat. Sos sardos proant a nche la paregiare a su de 63 minutos cun unu tiru lìberu de Bruno Alves, ma sa botza nch'essit. Cumintzat sa giostra de sos càmbios e su giogu mènguat s'intensidade sua. Su Chievo tenet un'àtera paja de ocasiones, ma non resesset a raddopiare. Acabbat 1-0.
Formatziones
Chievo: Sorrentino, Cacciatore, Gamberini, Spolli, Gobbi, Castro, Radovanovic, Izco, de Guzman (73' Rigoni), Pellissier (82' Inglese), Floro Flores (8' Meggiorini).
Allenadore: Rolando Maran
Casteddu: Storari, Ceppitelli, Salamon (70' Isla), Bruno Alves, Bittante, Barella, Munari, Padoin, Di Gennaro (79' Borriello), Farias, Giannetti (66' Melchiorri).
Allenadore: Massimo Rastelli
Gol: 53' Gobbi
