Aunire sas ìsulas de su mediterràneu. Fiat custu su tema de unu seminàriu in sas Baleares, a ue at leadu parte finas sa Còrsica. S'obietivu est su de creare lìnias aèreas de servìtziu pùblicu intre sa terra de Pasquale Paoli e sas àteras ìsulas.
Sunt craras sas paràulas de Jean-Félix Acquaviva, presidente de s'Ofìtziu de sos trasportos de sa Còrsica. «Cherimus isfrutare s'artìculu 174 de su tratadu europeu chi permitit de nch'insertare sos territòrios insulares, cun densidade de populatzione bassa, in su fràigu de una polìtica adeguada in su setore de sos trasportos – at naradu su presidente, agiunghende – est a nàrrere chi chircamus de creare una continuidade de servìtziu pùblicu intre sas ìsulas».
Pro fàghere un'esempru, no est possìbile chi pro andare dae Ajàciu a Parma de Majorca, chi nche sunt a tesu 600 chilòmetros, bi chèrgiant 7 oras de tempus. Tocat de pigare s'aèreu pro Nitza, un'àteru pro Bartzellona e dae in cue su pro nche cròmpere a sa capitale de sa Comunidade autònoma de sas Baleares.
Est pro cussu chi s'àndala pretzisa est sa de sos finantziamentos europeos. Sa prima fase at a prevìdere unu collegamentu intre Còrsica, Sardigna e Itàlia e, in manera particulare, cun sos aeroportos de Pisa, Bastia, Ajàciu, Terranoa e Casteddu. A pustis at a èssere su turnu de su collegamentu Baleares (Parma de Majorca)-Còrsica (Ajàciu)-Itàlia (Roma).
Sa punna est de ativare s'oferta intre su 2017 e su 2018.
