In pagu prus o mancu duos meses sos ativistas de Libe.r.u. ant collidu a pare 6.300 firmas pro cuntrastare sos fogos. Sa campagna de adesione, acumpangiada a sa de sensibilizatzione, est acabbada su 30 de cabudanni.
«Nch'amus torradu a sos sardos sa responsabilidade de custu argumentu – at naradu Pedru Frantziscu Devias, segretàriu de su partidu – sos tzitadinos ant rispostu e l'ant fatu in medas». Sas propostas de sa petitzione prevident santziones prus graes a sos piròmanes, sa crèschida de sas campagnas de sensibilizatzione, s'afortimentu de su sistema de preventzione de sa Regione, su rinnovu de sos mezos, de sas istruturas e sa dotatzione de elicòteros e canadair de propiedade de sa Regione.
Sos militantes nch'ant giutu sos mòdulos pro sas firmas a prus de 200 comunas e ant ammaniadu initziativas pùblicas in sas pratzas de sas tzitades prus mannas. In sas dies imbenientes, sas firmas autenticadas ant a biagiare conca a s'iscrivania de su presidente Pigliaru. In s'ìnteri sos militantes ant pedidu sas dimissiones de s'assessora de s'ambiente Donatella Spano. «Nch'at iscarrigadu - at sighidu Devias - sas responsabilidades subra de sos traballadores ochi-fogu, obligados a operare sena suportu e sena mezos adeguados. At dimustradu de no èssere adata a gestire custa genia de fenòmenos e creo chi sos sardos, cun sas firmas issoro, apant naradu chi b'at bisòngiu de un'impignu prus mannu e de persones prus cumpetentes».
