 |
| Deretos terremarsicane. Url imàgine |
S'iscoberta arribat dae su Canadà e faeddat de sos cannabinòides, sustàntzias chi diant pòdere èssere a tretu de crèschere s'atividade de sas tzèllulas retìneas, megiorende sa vista. Sa chirca est publicada in sa rivista eLife.
Sos sientziados de s'Istitutu neurològicu de Montreal ant istudiadu sas reatziones de su conchemàgiu siat impreende sustàntzias esògenas e siat cun sustàntzias endògenas. In ambos sos casos b'at àpidu unu megioru in sa visione de su conchemàgiu, fintzas cun pagu lughe. Est crèschida s'atividade de sas tzèllulas chi trasmitent sos impulsos dae s'ogru a su cherbeddu, sas tzèllulas gangliares de sa rètina.
Como tocat a bìdere si sos resurtados otènnidos in laboratòriu si nch'ant a pòdere tramudare a s'òmine. Su passu imbeniente previdet sa proa subra de sos mammìferos, mescamente subra de sos sòrighes, e a pustis in sas tzèllulas de sa rètina umana, in laboratòriu.
