 |
| Incarca subra de s'imàgine pro l'ismanniare |
Sa segunda semifinale intre Frantza e Germània prèmiat sos giogadores de Didier Deschamps. Sos biaitos ant ischidu isfrutare mègius sas oportunidades in atacu e nch'ant serradu sa partida cun duos gol de iscartu.
Griezmann nch'at leadu in vantàgiu sos suos gràtzias a unu tiru de penalidade in sos ùrtimos minutos de su primu tempus. Schweinsteiger at tocadu sa botza cun sa manu e s'àrbitru at cuntzessu deretu sa punitzione màssima. In su segundu tempus sa Germània non pariat bastante motivada pro nche cròmpere a su parègiu. Sos transalpinos pariat chi tennerent carchi cosa in prus in sas ancas. A su de 72 minutos est arribadu su raddòpiu. Sos defensores tedescos ant atzoroddadu in intro de s'àrea de penalidade issoro e ant pèrdidu sa botza. Pogba nche l'at torrada a ghetare a mesu, Griezmann nche l'at collida e at signadu sa de duos aprofitende fintzas de sa faddina de su portieri Neuer.
Sa finale intre Frantza e Portogallu at a èssere domìniga sero a sas noe.
