«Cando abèrgio su situ de su guvernu e essit a campu su ministru Kyenge, deo abarro sicu. Deo los istimo sos animales, pro caridade de Deus. Ma si m'agato cara a un'orangu, abarro galu abbolotadu». Fiat su 13 de trìulas de su 2013. Fiant sos faeddos de s'ex ministru Calderoli, senadore leghista. In sas oras coladas Emmanuel Chidi Namdi, nigerianu de 36 annos, fuidu dae s'inferru pesadu dae Boko-Haram, si nch'est mortu in s'ospidale. Si nch'est mortu ca l'ant fertu a morte, in Fermu. Fiat defensende sa mugere ca duos fascistas la fiant cramende “moninca”. A pustis de s'acadessimentu, sa polìtica ufitziale at naradu sa sua, cundennende e pranghende. Ma pro sos incuilinos de Palatzu Madama, Calderoli no aiat fatu peruna discriminatzione ratziale, petzi difamatzione. A l'ant a àere su coràgiu de reconnòschere s'ipocrisia? E sos giornalistas chi faeddant de ultras e non de fascistas a l'ischint chi b'at unu fiotu de ultras antiratzistas? Mala tempora currunt.
