Sos fogos de sas dies coladas si nch'ant papadu prus de 4mìgia ètaras de terrinu, arruinende e a bortas distruende sos sacrifìtzios de chie traballat in su sartu. Sos piròmanes ant operadu in Uta, in Orane e in Furtei, ma su fogu prus mannu at traessadu sa provìntzia de Nùgoro crompende·nche a sa de Aristanis. Un'inferru mannu dae Bòrore finas a Bìroro, Bortigale, Noragùgume, Duarche, Sèdilo e Aidumajore.
Su mecanismu de sa solidariedade s'est mòvidu deretu in manera pagu prus o mancu organizada. In totu s'ìsula sas comunas e sos tzitadinos si sunt ponende a disponimentu pro agiuare sos pastores e sos chi ant pèrdidu totu.
In Gerxei su sìndigu, in pare cun sos tzitadinos, s'est movende pro donare dinare e fenu a sas aziendas interessadas dae su fogu. Sa matessi cosa est acontessende in Silanos, in ue s'amministratzione ghiada dae Giuanne Pedru Arca at organizadu sa regorta de su fenu pro su 13 de trìulas in su pratzale de sas tzisternas, in s'apendìtziu de Birdis.
Àteras manos de agiudu sunt arribende dae totue, cadaunu est faghende su chi podet.
