 |
| Deretos huffingtonpost.co.uk, Url imàgine |
Sos dotores americanos ant registradu su primu casu de batèriu chi resistit a totu sos antibiòticos connotos. S'allarme est mòvidu dae sos tzentros de controllu e de preventzione de sas maladias.
Sos sientziados sunt oriolados pro custa genia noa de patògenos, sos super-batèrios. Diant pòdere rapresentare unu perìgulu grae pro cumbàtere sas infetziones, bidu e cunsideradu chi, in sos Iua, sa resistèntzia de sos agentes infetivos càusat duos milliones de maladias e 23mìgia mortos a s'annu.
Sos istudiosos ant naradu chi su de sos Istados unidos est su primu casu in ue un'agente patògenu tenet unu gene Mcr-1. Est su chi li permitit de resìstere a sos antibiòticos, fintzas a sos prus potentes comente sa colistina.
Sa comunidade sientìfica est in allarme e in chirca de remèdiu.
