 |
| Deretos Ansa, Url imàgine |
Eris a mangianu, una cadena longa de comitados, giòvanos, pensionados e amministradores locales at inghiriadu s'ospidale Nostra Sennora de sa Mertzede de Lanusè. Sa protesta, chi est andende a dae in antis dae pagu prus o mancu unu mese, cheret firmare su declassamentu de s'istrutura sanitària.
Dae totu sas biddas ogiastrinas b'at acudidu mìgias de pessones, ghiadas dae sos sìndigos de su territòriu, pro nàrrere chi nono a sa reforma de sa rete ospidalera. «Cherimus chi s'ospidale nostru abarret de primu livellu» - narant sos assòtzios e sos comitados chi si sunt addobiados in pratza, agiunghende - «Nos nche cheret bogare fintzas sos repartos de emo-dinàmica e de patologia tzèrebro-vascolare».
In Murera puru, eris etotu, b'at àpidu una protesta simigiante pro defensare s'ospidale de su Sàrrabus, interessadu, fintzas custu, dae sa reforma.
