 |
| Deretos Afp. Url Imàgine |
Chie est arga inoghe est arga in
Frantza, si narat. Su progetu de riforma de su mercadu de su traballu
aprontadu dae su guvernu "sotzialista" frantzesu no est cosa disconnota:
at a èssere prus fàtzile a litzentziare, ant a crèschere is oras de
traballu e sa flessibilidade, su còdighe de su traballu at a èssere su
chi is imprendidores cherent. A pustis de unas cantas pesadas (500mìgia
traballadores in pratza su 9 de martzu, belle 200 iscolas "serradas" su
17 e isciòperu de is istudiantes su 24) su guvernu at fatu carchi
cuntzessione, ma s'impiantu legislativu de sa riforma El Khomri (dae su
sambenadu de su ministru) abarrat su matessi. Ma si in Itàlia sa Cgil
isciòperat a missa essida (a lege aprovada), in Frantza is sindacados
Gct e Force ouvrière ant naradu chi ant a sighire a gherrare finas a
cando non nche retirant is disinnos guvernativos E, cun s'isciòperu de
oe, 31 de martzu, forsis tocat de annoare su ditzu.
Manifestatziones
peri su paisu, iscolas e universidades serradas, bolos cantzellados,
atracos blocados, disàgios in is trasportos pùblicos, pagos giornales in
edìcola. Galu est chitzo pro nàrrere chi nche semus torra in su clima
de su 1968. A sa segura est diferente meda su cuntestu (tando s'economia
fiat creschende, imoe a s'imbesse), ma fiat dae meda chi non si bidiat
unu fronte cumpatu de traballadores e istudiantes.
A su chi
narant is sondàgios, su 70% o barda de sa populatzione est contràriu a
custas mudadas legislativas. Est sa risposta prus crara a is chi, a
pustis de is atentados de Parigi, naraiant chi sa Frantza fiat
furriende·si a dereta. Su guvernu de Holland, in crisi de cunsensos,
tenet una duda prus manna de sa grandeur bisada: si sighit cun is
disinnos suos at a fàghere crèschere is pesadas; si faghet unu passu a
dae segus est comente a reconnòschere su poderiu de is traballadores.
Meda at a dipèndere dae is passos imbenientes de is ghias sindacales, ma
su chi semus bidende est chi non b'at mesuras de seguresa chi potzant
firmare sa cumbata sotziale.
