Turchia. Dèdicat sa vitòria a sos curdos mortos pro manu turca, 12 giorronadas de iscualìfica

de Maurìtziu Sale

Deretos cnnturk.com URL imàgine

Acabbada sa partida, bìnchida 2 a 1 dae s'Amedspor (sèrie C) contra a su Bursaspor(Süper Lig), Deniz Naki, tzentrucampista de s'Amedspor e autore de una de sas duas retes, at pensadu de fàghere cosa agradèssida e dèghida dedichende sa vitòria de s'iscuadra sua a sos curdos mortos pro manu turca. Su pensamentu suo l'at afidadu a sos canales de facebook e de twitter insertende·nche una frase càrriga de sentidu. 
«Dedicamus custa vitòria a totu sos cumpàngios mortos e a sos fertos a cajone de sa repressione rebesta chi sunt faghende in terra nostra dae belle duos meses. Semus fieros de èssere un'ispera de lughe pro sa gente nostra in grandu dificultade. Comente Amedspor, non nos semus sutamìtidos e mai nos amus a sutamìtere a nemos. Vida longa a sa libertade!» 
Inoghe sa Copa de Turchia 2015/2016.

S'acusa de propaganda ideològica terrorìstica no at istentadu a nche cròmpere e sa Federatzione l'at comminadu sa pena in unu fàghere de rugre: 12 giorronadas de iscualìfica e belle 7mìgia èuros de multa. Como tocat a isetare s'interventu de s'àtera giustìtzia:sa turca, sa de Erdogan chi de isportivu non tenet nudda. In s'ìnteri difatis e in bia preventiva, sas milìtzias turcas aiant giai cumpudadu sa sede de sa sotziedade Amedspor, pesende su logu a trèulu pro messàgios presuntos de propaganda. Sa die, però no aiant agatadu perunu riscontru reale. Tando s’ant servadu s'òdiu pro àtera ocasione e a nche nd’iscùrfere sas cunsighèntzias est istadu Deniz Naki. Giogadore de 26 annos, nàschidu in Germània, ma de orìgines curdas e istrintu a su Pkk, su partidu de sos traballadores. Giogadore cun unu bisu de riscatu in su coro, ma cun s'ammuntadore de sa presone cara a cara e como fintzas a pagu tretu.  Sa Turchia est fintzas custu.