Cun s'intrada in vigèntzia de su Collegadu ambientale (Lege 221/2015) su 2 de freàrgiu coladu, is Comunas nch'ant a
pòdere ammaniare, in intro de is ìsulas ecològicas issoro, unos cantos
giassos dispostos a sa cuncàmbia de benes betzos. Trastes giai
impreados, ma chi non sunt galu de nche fuliare, s'ant a pòdere
espònnere pro unu tempus istabilidu. In custa manera, chie esseret
interessadu, nche ddos diat pòdere recuperare in antis chi nche ddos
elìminent pro semper. Ddu narat s'artìculu 66 de sa lege
mentovada chi mudat s'artìculu 180-bis de su Decretu legislativu 152 de
su 2006. Pro su legisladore diat èssere una manera pro menguare sa
cantidade de refudos e finamentas is gastos de gestione.
Sa
Lege 221 no imponet nudda. Sa Lege 221 lassat a is Comunas sa facultade
de nàrrere chi emmo o chi nono a custu "baratu" (gasi comente
acontesset cun su "baratu amministrativu", àtera fatzenda). S'in
casu ddu diant acollire s'ant a dèvere adeguare, semper e cando, a sa
disciplina natzionale e a is regulamentos issoro chi prevident unos
cantos òbligos e proibitziones aprontados in contu de oràrios e de
modalidades de cunferimentu. Difatis est finamentas proibida (e non
mancant is santziones) sa possibilidade de nche bogare, in cale si siat
manera, is benes una bia insertados in is cuntenidores. Custas
disciplinas ant a èssere petzi una guarnissa. Imoe tocat a bìdere is
reatziones. Siat de is amministratziones, siat de is tzitadinos.
