 |
| Deretos La Presse/Reuters. Url imàgine |
Sa note in pessu colada, in su bighinadu
cairesu de El-Darb Al-Ahamr, ddoe at àpidu un'àtera morte cajonada dae
sa politzia de Al-Sisi. A su chi narat su giornale Al-Ahram (mentovende
una nota de su ministeru de s'Internu) paret chi sìamus cara a
un'acadessimentu de crònaca niedda, nudda de prus. Unu politziotu,
intrende·si·nche a unu taxi, at àpidu unu chertu cun su tzaferru pro
chistiones de pagu contu. Nât chi dd'at mortu pro errore a pustis de si
nd'àere bogadu sa pistola pro dd'assussegare. Mohamed Ali Ismail aiat 24
annos. Lestra sa reatzione de is presentes: su politziotu si nch'est
dèpidu fuire pro no èssere fertu issu puru. Su generale de sa Diretzione
de seguresa, Khaled Abdel Mataal, at naradu chi su mortore at a èssere
arrestadu. Ma ddoe at àteru a rodeu. Su sistema de abusos essidu a campu
cun sa morte de su chircadore italianu Giulio Regeni at a pòdere
cajonare una pesada populare noa, che a sa de pratza de Tahrir de su
2011. Dd'at naradu Wendell Steavenson, càlamu de su Financial Times e osservadora a minudu de sa rivolutzione chi nch'at bortuladu su poderiu de Hosni Mubarak.
Al-Sisi
no at indiritzadu sa repressione petzi contra a is Frades musulmanos.
Su pùngiu de ferru suo ddu connoschent finamentas is organizatziones de
sa sotziedade tzivile, is sindacados bene connòschidos dae Regeni, is
giornalistas. «Al-Sisi - at iscritu Steavenson - sighit a
nàrrere chi s'esèrtzitu est su garante de sa rivolutzione de su 2011, ma
is servìtzios de seguresa suos nche ponent in presone is pessones chi
dda bolent ammentare. Est unu paradossu chi no at a règhere». In
s'acabbu de ghennàrgiu sa politzia at iscutu duos mèigos in intro de
un'ospidale ca non ant chertu mudare is informatziones cuntènnidas in
intro de unos cantos tzertificados. A pustis de custu abusu mìgias de
collegas issoro ant comintzadu a protestare e a iscioperare pedende
s'arrestu de is politziotos e is dimissiones de su ministru de sa
Salude. Creschet, duncas, sa repressione, ma, a su matessi tempus,
creschet sa risposta populare contra a su regime. A su chi at naradu sa
giornalista «s'esperièntzia de sa rivolutzione est galu caente in sa conca de is egitzianos».
