Giorronada nùmeru 27
In sa partida de s'andada sos òmines de Rastelli nche sunt torrados a domo a manos iscutas, perunu puntu. Fiat sa prima derrota de s'istajone. Ma ammentemus·nos chi, pro sos sardos, a giogare in s'istàdiu de domo cheret nàrrere a tènnere un'arma in prus. Finas a como 13 partidas bìnchidas, unu parègiu e peruna partida pèrdida. Oe però, su Pescara cheret fàghere puntos pro si nch'acostiare a su segundu postu e pro chircare de si nch'istesiare dae su trenu de sos isparègios.
Sos marchigianos movent deretu a dae in antis e agatant su gol de su vantàgiu. Nche colant petzi duos minutos. Torreira, cun unu tiru de esternu destru, nche ponet in fora de giogu sa defensa aversària e sinnat su zeru a unu. Su portieri sardu non podet fàghere nudda. A su de noe minutos su Pescara andat a curtzu a su raddòpiu, ma su tiru de Lapadula est tropu artu. Sos sardos, in custos primos minutos, non resurtant a prodùere giogu, parent pagu atentos e pagu pretzisos in sos passàgios. Sos òmines de Massimo Oddo, imbetzes, parent cobertos bene in dae segus e in sos cuntratacos dant anneu a sa defensa sarda e a Storari. Sos biancu-asulos chircant in cada manera de nche marcare su de duos, ma sa defensa de su Casteddu, in una manera o in s'àtera resessent a nch'isboligare su murùtzulu. A su de 30 minutos de su primu tempus su Pescara at giai operadu sete tiros dae su cugione contra a sos zeru de sos ruju-biaitos. Arriscant meda sos sardos, mescamente dae su ladus de dereta, in ue si movet bene Caprari. S'isvilupat dae cussa ala sa majoria de sas atziones de atacu de s'iscuadra pescaresa. A su de 45 minutos Joao Pedro at sa possibilidade de paregiare cun sa conca, ma Aresti defensat bene sa porta sua, respinghende sa botza a chirru de susu de sa traessa.
In sa segunda fase de giosu sa mùsica paret mudada. Su Casteddu chircat de paregiare deretu, cun Melchiorri, ma su tiru suo lu respinghet sa traessa e torrat in segus. Su Pescara est semper su matessi de su primu tempus, faghet su giogu suo e sighit a creare problemas a sa defensa locale. Lapadula Caprari e Verre sunt sos prus ativos. Cun s'intrada de Giannetti carchi cosa però mudat, sos sardos sunt prus perigulosos. A su de 61 minutos su Casteddu nche torrat su puntègiu a s'echilìbriu. Farias, ismarcadu in dae in antis de s'àrea aversària, retzit sa botza e la piatzat in su cugioneddu bàsciu de manca. 1-1. Como sunt sos ruju-biaitos sos protagonistas e non perdent tempus a si fàghere intèndere. A su de 67 minutos sos casteddajos òperant unu tiru dae su cugione, sa botza nche crompet a sos tretos de Lapadula chi, cun su petus e sena lu chèrrere, nche la ponet in intro de sa porta sua. Su resurtadu como est bortuladu, 2-1 pro su Casteddu. Unu minutu a pustis, su nùmeru deghe pescaresu chircat de si fàghere perdonare dae sos suos cun unu bellu tiru a bolu, ma sa traessa li narat chi nono a issu puru. In sos ùrtimos minutos sa partida si nch'indòrmigat agigu, su Pescara chircat de acontzare su dannu chirchende in cada manera su parègiu, ma sa defensa sarda amparat bene sos tretos de Storari. Su recùperu de bator minutos nche colat lestru. Acabbat 2-1 pro su Casteddu.
Fintzas custa borta su Sant'Elia at fatu su dovere suo, aumentende sas giorronadas de imbatibilidade de sos ruju-biaitos. Ma si devimus faeddare de giogu, a sos sardos, oe, lis est andada fintzas tropu bene. Su primu tempus fiat belle a sensu ùnicu, petzi in su segundu nch'est essidu a foras s'atza de sos òmines de Rastelli. Pro como si podent godire sulenos su primu postu, a ses puntos de distàntzia dae su Crotone chi, at a giogare cras cun sa Salernitana.
Formatziones
Casteddu: Storari, Balzano, Salamon, Krajnc, Barreca, Cinelli, Di Gennaro (26' Colombatto), Fossati (57' Giannetti), Joao Pedro, Melchiorri, Farias (80' Deiola).
Allenadore: Massimo Rastelli
Pescara: Aresti, Mazzotta, Zampano, Mandragora (82' Acosta), Zuparic, Memushaj (76' Mitrita), Torreira (76' Cocco), Verre, Caprari, Benali, Lapadula.
Allenadore: Massimo Oddo
Gol: 2' Torreira, 61' Farias, 67' Lapadula (autogol)
