 |
| Deretos gds, Url imàgine |
Deghinas de mortos, custu est su bilantzu provisòriu de s'atentadu a s'acadèmia de politzia de Zlitan. Semus in Lìbia, a pagu prus o mancu 175 chilòmetros dae Trìpoli. A su chi narat sa televisione Al Arabiya sos mortos diant dèvere èssere unos 70, ma sos datos non sunt ufitziales. Pro seguru su ministeru de sa sanidade faeddat de un'isterrimenta de una chimbantina de mortos intre tziviles e politziotos. Sos fertos imbetzes diant dèvere èssere unos 150.
Su tzocu de s'esplosione nche l'ant intesu finas a Misurata chi est a 45 chilòmetros. S'Isis custa borta at impreadu unu càmiu-bomba, de sos chi a su sòlitu s'impreant pro carrare abba, ca tenent tzisterna manna. In intro però fiat càrrigu de tritolu.
A ora de sas 8:30 sas ghannas de sa base de addestramentu si nche sunt brincadas a chelu e, paris cun issas, fintzas su kamikaze chi at ghiadu su mezu. In s'istrutura b'aiat unas 300 pessones. Fiant rèclutas de sa bàrdia de mare lìbica, impinnadas in sas operatziones contra a s'immigratzione clandestina. Daesh at legitimadu deretu s'atacu.
