de Maurìtziu Sale
 |
| Deretos Unicef. URL imàgine |
In su mundu giai dèbile de sos emigrantes, b'at unu ladus, si est mai possìbile, galu prus afrigidu e disditzadu. Est su de sos pipios. Est su de sos arriscos chi patit cada pipiu intre sos disamparados in chirca de acasàgiu. E s'Europa est muda che roca, cara a sos delitos peus. A su tràficu de òmines, de fèminas e mescamente de pipios. A sos abusos. A sa violèntzia. A sa morte. Su raportu de Taskforce on Children on the Move est cruu, fritu e prìngiu de nùmeros. S'initziativa est mòvida dae 41 garantes de sos minores. Dae 33 paisos europeos.
Sos pipios in tràmuda devent «afrontare
arriscos de cada casta e chi non si podent bajulare, peri su caminu pro
nche cròmpere a Europa. E si pensamus chi de tres partes una de sos
emigrantes sunt pipios, su contu nch'est belle fatu», si leghet in su documentu. «E
chie bi reventit a nche barigare su tretu, est leende cara a
esperièntzias traumàticas chi no at a ismentigare mai: abusos sessuales,
violèntzias in sos logos a ue nche crompent, s'ischirriada dae sos
babbos e mamas issoro in sos giassos trùbulos de controllu e de
identificatzione. E s'arriscu prus mannu: su de devènnere vìtimas de
cummèrtziu, de tratativas intre contrabbanderis. Pro dinari o pro
isfrutamentu imbeniente»
«Abbaidende sa chistione dae su chirru polìticu - iscriet Al Jazeera - su
raportu rechedet a sos guvernos europeos, unu megioru in sos mètodos de
controllu peri sas làcanas e una punna forte pro torrare a aunire sas
famìlias chi si sunt iscrobadas in caminu» . Ma sas rispostas chi
dant unos cantos paisos europeos, a sa suferèntzia e a su disacatu de
s'immigratzione, sunt diferentes in pesu e mesura. Sa Danimarca - balet a
lu mentovare in mesu a medas - at aprovadu una lege chi previdit su
secuestru e sa cunfisca de sos benes in possessu de sos emigrados.
Dinari o benes de vàllia chi nche bàrighent sos 1340 èuros.
Sa
lege votada belle a s'unanimidade, duncas fintzas dae sos progressistas
sotzialdemocràticos, at incassadu sas crìticas de su Consìgiu europeu e
sa cundenna de sas organizatziones umanitàrias. Ma est in cue. Firma.
Ratificada. Un'ispigru in ue cada guvernu, mannu e minore, reatzionàriu o
progressista, si nche podet mirare. Die cun die.
