Carta de identidade eletrònica, in Sardigna pro como petzi 4 comunas

de Lisandru Beccu

Deretos Leggo, Url imàgine

Dae su mese de martzu bator comunas sardas ant a pòdere cumintzare a emìtere sas primas cartas de identidade eletrònicas. In Sardigna, su progetu chi si nch'at a cumpletare in su 2018, l'ant abertu sas comunas de Iglèsias, Lùvula, Macumere e Tàtari.

A pustis de sa publicatzione de su decretu ministeriale chi at istabilidu su protzedimentu de emissione de su documentu, s'Agid (Agentzia pro s'Itàlia digitale) at comunicadu chi s'aviu de sa difusione de sas primas cartas at a garantire livellos de seguràntzia artos meda. Su sistema tzentralizadu at a permìtere de artziare sos paràmetros chi garantint sa riservadesa. Sos datos de sos tzitadinos, difatis, ant a èssere codificados cunforma a sos istandard europeos in contu de documentos eletrònicos. In custa manera, a su chi narant, ant a menguare sas possibilidades de contrafatzione.

S'ischeda plastificada at a cuntènnere datos meda, dae sas imprentas digitales a su còdighe fiscale, ma fintzas indiritzu e recàpitu telefònicu. Sa noa de importu est chi su tzitadinu, si cheret, at a pòdere dare su cunsensu pro donare sos òrganos. Custu sèberu però at a èssere a disponimentu a pustis de su mese de trìulas, cando ant a publicare sa diretiva pro sa donatzione de sos òrganos.

S'ùnica cosa segura est chi su prètziu de sa carta, nessi a su cumintzu, at a èssere intre sos 15 e 20 èuros.

Elencu de sas comunas