 |
| Sa bartza manna de Terramaini, in Casteddu. Autoiscatu. Campionados regionales de nàdigu, esordientes e juniores, de su 2012. Fotografia de Maurìtziu Sale |
•Temas
Pro nche regòllere momentos de vida, unos cantos bìculos de esistèntzia, si podet adotare una tècnica particulare, ponende sa fotocàmera subra de sa trìbide e lassende·la a fàghere iscatos a sa sola. In automàticu. Podet èssere un'esperimentu galanu e profetosu de praticare in logos meda. In logu de parìllias, de partidas de fùbalu, de manifestatziones, in sas partas prus mannas de sas tzitades nostras. Sos resurtados cadaunu nche los podet collire a pare in vàrias cartelleddas temàticas. Pro los servare a un'ala, in intro de sa cherbeddera illacanada de s’elaboradore e pro los abbaidare in cale si siat momentu. Pro chistiones de istùdiu, de chirca o petzi pro su praghere personale de nche sejare cales sunt sos megioros cun su tempus.
Si sèberat s’impostatzione manuale (M). Si programat un'iscatu su minutu. Sa posa est fissa, est a nàrrere chi s'obietivu est puntadu semper a su matessi logu e semper cun sos matessi paràmetros. S'abertura de su diaframma (a f5.6), sa sensibilidade (a Iso 100), su tempus de espositzione (a 1/125), sa profundidade de su campu a infinidu e gosi sighende. In sa fotografia publicada, s'obietivu fiat unu 18-105mm: 18 mm de longària focale mìnima e 105mm de longària focale màssima, reguladu a 35mm. Su bellu de custu mèdiu de iscatare est chi su fotògrafu non b’est in palas de s'obietivu, duncas no ischit ite nch'at regòllidu fintzas a cando, a pustis de un'ora o barda, non nche remunit sa màchina e cumentzat a iscartafolliare sas figuras, a bellu a bellu.
•Resurtados
Sa satisfatzione e, a bias, s’ispantu sunt mannos ca si est a beru chi sa natura est unu sugetu galanu e dìligu a lu fotografare, sa gente, su pòpulu collidu a pare, est a sa segura unu de sos mègius in assolutu. Custa fotografia nos dat contos giustos de comente semus fatos, sos òmines. Inoghe, in custu momentu particulare, s'interessu est unu e un'ebbia pro totus: su disafiu de sos pitzinnos in abba. E in medas giai sunt atendende·lu, ma su bonu – comente podet annotare un’ogru prus atentu - sunt in àteras fainas afainados.
