 |
| Deretos blueplanetheart, Url imàgine |
Eris su ministeru de s'internu saudita at annuntziadu s'esecutzione de 47 pessones. In mesu b'aiat emmo carchi terrorista ligadu a Al-Qaeda, ma fintzas carchi aversàriu polìticu de re Salmān. In Aràbia saudita s'annu coladu b'at àpidu 157 cundennas a sa pena de morte, a su sòlitu impicu, lapidatzione e decapitatzione. Su protzedimentu est aplicadu a sos reatos de: morte, isburvadura, rapina, tràficu de droga, adultèriu, omosessualidade, apostasia e sabotàgiu.
Unu de sos cundennados fiat Nimr al-Nimr, 55 annos, cundennadu pro rebellia. Fiat semper in prima lìnia pro sos deretos de sa minoria sciita, cheriat sas eletziones democràticas e fiat unu de sos aversàrios printzipales de su rennu. “Sa gente non cheret guvernantes chi ochient e chi repressant a chie protestat” - aiat naradu in su 2012 in antis de l'arrestare. Como s'esecutzione de su religiosu diat pòdere ingendrare rebellias mescamente in su levante de su paisu e in su Bahrein, in ue est cuntzentrada sa majoria sciita. Fintzas sa risposta de s'Iran est arribada dereta. Su guvernu de Teheran at minetzadu: Riyad l'at a pagare cara sa morte de al-Nimr.
In custa manera su regime totalitàriu alleadu de Europa e Istados aunidos torrat a nche prenare sas pàginas de sos giornales. In sas dies coladas sas Natziones aunidas cun su raportu issoro aiant pedidu de firmare sos bombardamentos sauditas ca sa situatzione de sos tziviles in Yemen fiat grae meda, ma nudda. Como imbetzes tocat de fàghere sos contos cun sas esecutziones e cun s'atrotzidade issoro. Su mètodu non si nch'istèsiat meda dae su chi connoschimus mègius, su de Daesh. Ma dae un'istadu chi non permitit a sas fèminas de ghiare sa vetura ite nos podimus isetare?
