 |
| Deretos Ansa URL imàgine |
Sos protzessos-coete. Sunt protzessos chi durant unu fàghere de rugre. In su giru de pagos segundos, sordados-giùighes bene annestrados nche sejant su colpèvole, istabilessent su gradu de sa curpa, emitint sa sentèntzia e la pràticant in s'istante matessi chi la sunt emitende.
Pagu prus o mancu semper gosi in Israele. Eris in Silwad (a probe de Ramallah, in Cisgiordània), una fèmina palestinesa, ghiende una vetura conca a unos cantos sordados, at retzidu su bene bènnidu dae parte issoro. Istende a su chi ant decraradu sos militares, sa fèmina fiat puntende·lis a subra pro los catzigare cun sa màchina e issos - pro reatzione antitzipada (ossimoros bèllicos) - l'ant isparadu contra, ochiende·la.
Sa màdrighe est semper sa matessi. Sas reatziones de sos sordados non s'ischìrriant pro nudda dae su chi est su sillogismu natzionale israelianu: semus armados, tenimus un'inimigu in intro de domo, lu devimus ochìere in antis chi issu ochiat a nois. Sa fèmina, baranta annos, paret chi esseret mama de bator fìgios e l'at morta a fritu, sena peruna resone aparente, istende a su chi ant decraradu unos cantos testimòngios palestinesos chi fiant in s’oru a su momentu de sa morte.
