 |
| Deretos Ansa, Url imàgine |
•Deflatzione
Ùndighi intre sas grandu tzitades italianas sunt in deflatzione (mèngua de sos prejos, in macro-economia nda), cun tassos pro s'annu, averguados in su mese de santandria, suta su zero. Sunt rilevamentos de s'Istat, fatos istudiende s'andamentu de sas capitales regionales e de sos tzentros cun prus de 150mìgia de abitantes. Sa mèngua prus marcada in contu de prejos l'ant registrada in Bologna (-0,7%), segudada dae Padova (cun su 0,4%); Palermo e Catània (cun su 0,3%); Perùgia, Casteddu, Bari e Verona (cun su-0,2%); Venètzia, Mòdena e Aosta (cun su -0,1%).
•Inflatzione
Su tassu de inflatzione (crèschida de sos prejos, in macro-economia nda) pro s'annu, averguados semper in su mese de santandria, s'arressat in su 0,1%, duncas in falada cunforma a su mese de santugaine (+0,3%). Finas a como, dae su mese de maju de ocannu, est su valore prus bàsciu chi apant registradu, decrarat s'Istat cunfirmende sos datos preliminares. Pighende imbetzes sos indicos pro su mese, semper pro sos prejos de su consumu, s'Istat nos narat chi nche sunt suta de su zero, menguende finas a su 0,4%. Sa cajone nch'est totu in sa serrada de s'Expo - sighit s'istitutu de chirca - s'eventu lombardu difatis at serradu sas giannas in su mese de santugaine.
•Expo
Acontèssida gasi manna, sa de s'Expo, chi aiat impuntzadu sa crèschida de sos prejos giai dae sos meses antepostos a s'eventu e , in su momentu chi at serradu, sos listinos si nche sunt isunfrados. Cunforma duncas a su chi nos narat galu s'Istat, sa neghe nche diat èssere in intro a su setore alberghieru e de sa ristoratzione, e nos lu cunfirmat sutalineende sa mèngua prus chi non marcada de sos prejos in sa tzitade de Milanu, cun efetos mannos finas a livellu natzionale. Torrende a sos prejos averguados pro s'annu, sos de su cofinu de sas còmporas (màndigu, produtos pro sabunare domos e bestimenta, pro sa cura de sa pessone nda), nche colant in su mese de santandria a su +1,3%, dae su +1,5% de su mese de santugaine.
Baddu a ite nos ant a servire sos inditos puntilliosos e sa bona ispera de s'Istat. A dae chi su dinari est menguende prus in presse de sos prejos e chi, cando su tzitadinu nche chistit sas manos a butzaca pro lu chircare, nch'agatat in càmbiu un'eritzu meriende. E sa manu si nch'essit prus in presse de comente est intrada.
