 |
Su calendàriu est su chi est e pro li parare fronte, Rastelli, at detzisu de fàghere agigu de càmbios cunforma a sa partida de sàbadu coladu contra a su Livorno. Sa Copa Itàlia no est una prioridade pro sos ruju-biaitos, ma si sos resurtados arribant est pretzisu a nche los costoire in butzaca. A bisare sa finale non costat nudda. Sa partida de oe est difìtzile, sos milanesos ant s'esperièntzia de una categoria superiore e su vantàgiu de giogare in domo, sos sardos imbetzes sunt càrrigos de entusiasmu e ant gana meda de si pònnere in mustra.
Ambas sas iscuadras si movent cun atentu, chircant de fraigare unu giogu ordinadu e de mantènnere bàscia sa botza. A pustis de deghe minutos proat a si fàghere bìdere su Casteddu cun Benedetti, ma sa mira est isballiada. Rispondet Biabiany duos minutos a pustis, su giogadore si nch'agatat in dae in antis de Cragno, ma su portieri l'antìtzipat e respinghet sa botza. A su de 19 minutos Biabiany lassat mòvere unu passàgiu traessu. Sa conca de Palàcio est in cue, puntuale a s'addòbiu cun sa botza, ma b'est fintzas sa manu de Cragno chi, bolat e sarvat su puntègiu. A su de 24 minutos arribat su vantàgiu de sos nieddu-biaitos cun Palàcio. Custa borta est Juan Jesus a operare su passàgiu traessu dae su ladus de manca.
Manaj non bi resesset a nche l'indiritzare a porta, ma b'arribat s'atacante argentinu cun unu destru seguru e sicu. A su de 31 minutos Giannetti si nch'ismarcat dae s'aversàriu e si nche presentat cara a Carrizo chi, però, respinghet su tiru cun sos pees. In antis de sa pàusa est Cerri a chircare de sinnare cun unu tiru potente dae su lìmite de s'àrea, ma su portieri, in duas bortas, resesset a parare. In sa segunda parte de sa partida su Casteddu podet paregiare a su de 51 minutos. Unu tiru lìberu de Di Gennaro nche crompet a sos tretos de Pisacane chi, la tocat cun sa conca, ma sa botza nch'iscudet a su palu torrende in segus.
A su de 64 minutos sos sardos arriscant de retzire un'àteru gol. Di Gennaro si faddit unu passàgiu in s'àrea de rigore e Manaj pro pagu non nche marcat su de duos. Est torra Cragno a sarvare su resurtadu. Non nche colant nemmancu deghe minutos e su 2-0 arribat a beru. Bròzovic dae su ladus de manca si nch'atzentrat a sos binti metros e lassat mòvere unu tiru a su segundu palu. Su portieri ruju-biaitu si la podet petzi abbaidare. A s'Internatzionale non li bastat, a su de 80 minutos nche marcat su de tres, serrende sos contos de su totu. Bròzovic tirat dae foras de s'àrea, sa botza nche ferit contra a su palu e torrat in segus, ma bi pensat Pèrisic, intradu dae pagu, a nche la ghetare a intro. Sos àteros deghe nche colant cun su Casteddu chi proat a nche sinnare su gol de sa bandera, ma Carrizo amparat bene sa porta sua.
Sos òmines de Rastelli forsis non fiant bastante cumbintos de pòdere fàghere unu resurtadu de importu, forsis est mègius chi si penset a su campionadu, lis at a torrare prus a contu.
Formatziones
Internazionale: Carrizo, Montoya, D'Ambròsio, Medel (78' Gnoukouri), Juan Jesus, Nagatomo, Bròzovic, Biabiany (84' Dodò), Kondogbià, Palàcio (73' Pèrisic), Manaj.
Allenadore: Roberto Mancini
Casteddu: Cragno, Pisacane, Murru, Benedetti, Krajnc, Tello (50' Colombatto), Deiola, Di Gennaro (73' Farias), Joao Pedro, Cerri, Giannetti (78' Melchiorri).
Allenadore: Màssimo Rastelli
Gol: 19' Palàcio, 71' Bròzovic, 80' Pèrisic
