«A su presente a su nessi 96 deputados
subra de 350 chi cumponent su Parlamentu ispanniolu sunt, a manera
esplìtzita, a favore de su deretu a s'autodetzisione. De tres belle una
parte de sa Càmera. Est un'eventu insòlitu, singiale chi carchi cosa at
mudadu». Comintzat gasi s'editoriale de Gara, giornale bascu serente a sa manca abertzale
(patriòtica, Ndr). In su matessi artìculu benit ammentadu chi 36
parlamentares eletos dae Podemos, subra de 69, sunt galitzianos, bascos
e catalanos. Aici sa serrada: «custu iscenàriu òbligat is
indipendentistas e is democràticos bascos a torrare a cuntzepire is
alleàntzias, sa tempìstica e is passos imbenientes».
Gara, in
contu de Podemos, chistionat de «unionismu democràticu». E gasi est sa
chistione. Podemos no est una fortza indipendentista, e custu non
dipendet dae su fatu chi est una fortza presente in totu s'istadu
ispanniolu. No est indipendentista ca punnat a una repùblica
plurinatzionale fraigada a inghìriu de sa giustìtzia sotziale. Una
repùblica in ue catalanos, galitzianos e bascos non devent èssere
sutapostos a s'isciovinismu castillianu. Custa impostatzione, cun
proportziones dèghidas ma sena timòria de faddire, la podimus agatare
petzi una bia in s'istòria colada: in sa teoria leninista. E no est de
badas chi Pedro Sánchez de su Psoe aiat bogadu a campu sa pantàsima de
s'Unione soviètica, forsis cun s'obietivu de assuconare agigu de
eletores.
Ma si Gara chistionat oe de alleàntzias, in Galìtzia sa
cosa est mòvida dae tempus. Xosé Manuel Beiras, boghe de Anova
irmandade nacionalista, aiat naradu chi «si bolimus chi sa Galìtzia
comente natzione esèrtzitet sa soberania sua, est pretzisu a aprontare
alleàntzias a livellu de istadu». De s'istadu ispanniolu, naturale. E
difatis Anova, in pare cun Podemos, Esquerda unida e àteros, at pigadu
parte a custas eletziones suta sa sigla En marea. Conchistende 6
iscrannos de is 36 mentovados dae Gara.
In Catalùnnia is
eletziones ispanniolas nche sunt in sa mesa de sa Cup, su movimentu chi
punnat a una repùblica catalana de màdrighe sotzialista. Comente amus
naradu, is indipendentistas cun s'isteddada ruja (la estelada vermella)
ant sighidu a pedire una presidèntzia diferente dae sa de Artur Mas,
liberista e in fragu de corrutzione. Ma a su matessi tempus ant retzidu
un'oferta pro chi non sigant a nàrrere chi nono. Domìniga ddoe at a
èssere s'assemblea de su movimentu, in Girona. E in cue ant a seberare
ite fàghere. Ma, deretu, una camba de sa Cup, Endavant, at naradu chi
est mègius a torrare a votare in su mese de martzu «si nono est a regalare su capitale polìticu nostru a Podemos». Est craru chi ddoe apat timòria de pèrdere cunsensos comente est acontèssidu cun Bildu e Nós candidatura gallega est craru.
Galu
non s'ischit si in Madrid ddoe ant a renèssere a formare unu guvernu.
Su Psoe at retzidu prus de una pressione a tales chi non fagheret
mancare su sustennu a su Pp de Mariano Rajoy. Sa presidente de
s'Andalusia, sa sotzialista Susana Díaz, dd'at naradu a Sánchez de nche
lassare a banda a Podemos. Pro sa grandu coalitzione si sunt espressadas
finamentas is confindùstrias ispanniola (Ceoe) e catalana (Ec),
timoradas dae s'ecuatzione autodeterminatzione = furriada a manca.
Narende·li chi nono, a Rajoy, Sánchez dd'at torradu isceda a Pablo
Iglesias, chi fiat contrariadu dae s'ipotesi de su sustennu sotzialista a
su Pp. Ma Sánchez sighit a non bòlere atzetare cale siat arresonu in
contu de autodeterminatzione e duncas est narende chi nono fintzas a
Podemos e a is "lìnias rujas" suas. De ogni manera pro Sánchez is
eletziones noas rapresentant «s'optzione ùrtima» e issu etotu non diat bòlere chi, torrende a votare, nche bèngiat barigadu.
Totu
lassat a pensare chi in s'istadu ispanniolu s'est aberende unu perìodu
tribuladu. E chi is inditos de s'editoriale de Gara potzant èssere
realidade in su venidore imbeniente.
