 |
| Deretos Ansa/Ap. Url imàgine |
Is giornales chi essint in edìcola,
cunforma a is chi sunt in lìnia, non podent agiornare su matessi
artìculu. Current su perìgulu, duncas, de èssere betzos. Ma, a
diferèntzia de is àteros (e cando non cuant), nos ammustrant una
fotografia berdadera de su chi si contat a inghìriu de un'acadessimentu.
Si imbetzes diamus fàghere una chirca in is profilos sotziales de is
giornales in lìnia diamus bìdere chi su "post" o su "tweet" betzu de
unas 10/15 oras nos nche diant conduire a s'artìculu agiornadu (mancari
chi in s'artìculu no agatemus s'iscrita). Comente chi esseremus sighende
is coordinadas de unu "post" o de unu "tweet" nou.
Torrende
a is giornales essidos oe in edìcola e chistionende de su degòlliu de
eris in Santu Bernardinu, Califòrnia, podimus lèghere chi «tres òmines biancos» (custa est sa risposta dada a sa prima "W", est a nàrrere Who? Chie?) «armados» e «in tuta mimètica»
ant mortu batòrdighi pessones (degheoto is fertos) isparende una ràfica
de corfos in unu tzentru pro disàbiles. Pro s'Fbi, semper in su contu
de su chi essit a pìgiu oe in s'imprenta, fiat galu chitzo pro faeddare
de terrorismu («Galu non dd'ischimus» at naradu David Bowdich de s'istrutura de Los Angeles).
Imoe,
est noa chi agatamus in sa rete custu mangianu, si connoschent is
nùmenes de is mortores suspetos, segudados, tentos e mortos dae sa politzia: Syed
Rizwan, òmine de 28 annos, e Tashfeen Malik, fèmina de 27. E si
connoschet un'àteru particulare: Syed fiat de fide musulmana. Pro s'Fbi,
imoe, «Ddoe est sa possibilidade chi siat terrorismu». E custu,
in s'imprenta traditzionale, dd'amus a lèghere cras. Ca oe, nemos
faeddat de islàmicos. Finamentas Libero si lìmitat a faeddare de «Tres
bastardos».
Ma tando carchi duda est pretzisu a nos dda pònnere. Ite e cando est terrorismu? Su degòlliu de chimbe dies a imoe in Colorado, cando un'estremista cristianu e de dereta ochieit tres pessones in una clìnica in ue si pràtica s'istrumìngiu, ite est?
