 |
| Deretos lìberos, Url imàgine |
Su primu ministru giaponesu Shinzo Abe
s'est iscusadu. L'at fatu aberende unu fundu pro rimborsare sas
fèminas chi a pustis de 70 annos sunt galu bias. A su chi narant sos
analistas giaponesos sas iscraas de su sessu, sas shofu, fiant
unas 20mìgia. A su chi narant sas fontes prus seguras imbetzes fiant unas
200mìgia. Una bella diferèntzia. S'imperu giaponesu de tando las at
colovrinadas, imbaucadas e si nche las at furadas cun sa promissa de
su traballu.
Traballu chi però no esistiat e si
esistiat fiat mìseru, in sos casinos de s'esèrtzitu imperiale
nipònicu. Fiat una trampa bene parada. Arribaiant dae sa Corea de giosso, dae
sa Tzina, dae sas Filipinas, dae sa Birmània e dae s'Indonèsia. De
bator tres si nche sunt mortas. Non bi l'ant fata, sa violèntzia
fiat meda. Las torturaiant e las isburvaiant, die cun die, note cun
note. In pagas sunt resèssidas a mòvere a dae in antis, a si nche
liberare, ma sos trumentos mentales sunt abarrados e una vida normale
non l'ant pòdida prus contivigiare. Su prus malàidas, istèriles e
sena sa possibilidade de si torrare a fraigare una famìlia.
In su 1993 su Giapone aiat reconnotu
sas neghes suas, ma sa chistione si fiat firmada in cue. Como, a
pustis de àteros 22 annos, belle gasi est arribadu s'acordu. Unu
milliardu de yen, est a nàrrere sete milliones e setighenta mìgia
èuros pro agiudare sas fèminas galu bias. Una collaboratzione
istòrica in subra de un'argumentu chi poniat in cuntrastu sos duos
istados
Como sunt abarradas in 46 e, mancari in
ritardu, un'acanteddu de giustìtzia lis est dèvida. Mancari non nche cantzellet sas suferèntzias de tando.
