 |
| Raqqa suta su fogu frantzesu e americanu. URL imàgine |
A podet , unu cabu de Istadu, pònnere sa vida de fìgios suos in
perìgulu? A podet fundare subra de sa revesa sa cherta de s'òrdine e de
sa seguràntzia natzionale? Sa de su califadu, contra a sa Frantza in
particulare, est un’atzione o una reatzione? E si est una reatzione ,
cales sunt sas aziones chi l’ant originada? Pregontas galu suspesas in
àeras. Imbeladas dae su fumu e dae su nuscu de sa pùrvura. Ca est custu
su chi est acontessende in Frantza. E non dae eris. Non dae sa die de
sos assàchios chi ant cajonadu sa morte de 129 pessones e unu tràuma
grae pro àteras 352. S'atzione frantzesa contra a s'Istadu islàmicu
movet dae prus a tesu. Dae su 8 de cabudanni in pessu coladu, cando
Hollande e su cunsessu ministeriale suo, disinneint sa campagna militare
contra a s'Is movende dae s’Iraq.
E como - domìniga colada - su repartu aèreu de s'aeronàutica frantzesa (paret cun 4 aèreos Mirage F1CR e 6 Mirage 2000 Rafale), in pare cun su matessi repartu de sos Istados unidos (paret cun 2 B-1 Lancer e 3 F-16), ant bombardadu a manera grae sa tzitade de Raqqa. Tzitade cunsiderada dae s'imprenta internatzionale sa capitale de facto de s'Istadu islàmicu. Tzitade retenta. Òmines armados in totue. Pregadorias e ritos religiosos fortzados. Peruna mùsica o faina culturale o de discansu. Fèminas chi, sa cara semper cugugiada cun rigore, giughent a coddu s’Ak-47 e no lu frundint mancu acumpangende·nche sos fìgios a iscola o a giogare. Clima iscurigosu, imprenta belle bandida, minetzada, istransida. Dae banda de foras si nche lughet petzi nuscu de terrore e de pagu istabilidade in contu de raportos cun s'istràngiu. Mesches si est otzidentale.
Su guvernu frantzesu nch'at imbiadu duncas deghe aèreos de gherra noos chi ant isgantzadu a su nessi binti bombas, cunforma a su chi at decraradu a segutzianu Jean-Yves Le Drian, su ministru frantzesu de sa Defensa. Martis 8 de cabudanni, chenàbura 13 de santandria e domìniga 15 de santandria de su 2015. Datas istòricas. Datas chi marcant a ruju sas mapas geopolìticas. Las marcant cun su sàmbene. Sas resones frantzesas de tando sunt sas matessi de como? - si pregontat su mundu. Custu Le Drian no l'at acraridu. Comente no at acraridu mai - suta pregonta ufitziale de su parlamentu - s'apartenèntzia sua a sa massoneria frantzesa comente membru de su Grandu Oriente de Frantza. Comente no at acraridu sas resones de sa liaison, de su ligàmene - in custu atacu - cun sos Istados unidos a dae chi Obama, a sas primas, non fiat de acordu pro intervènnere in Sìria. Paràulas suas, pronuntziadas cara a sos rapresentantes de s'Onu. Sas pregontas sunt medas e galu imbeladas dae su mistèriu, a dolu mannu.
Siat comente si siat - pro sa Frantza - sos interventos aèreos ant corfadu unu tzentru de cumandu, unu tzentru de annestru, un'istrutura de reclutamentu de jihadistas e unu depòsitu de armamentos in Raqqa. In prus de unos cantos càmios chi fiant tramudende petròliu, armas e màndigu. Pro su califadu, paret imbetzes chi su bombardamentu nche siat rutu a mesu de su desertu e duncas nât chi no ant patidu peruna pèrdida, nen materiale , ne umana. Sos atacos de domìniga nche crompent 48 oras a pustis de su disacatu pariginu rivendicadu -ammentemus - dae su califadu.
Hollande at decraradu - cun faeddos bene pesados e chi ghiant
su pensu angenu conca a sas resone de istadu frantzesas - chi sos
fatos de Parigi sunt «un'atu de gherra praticadu dae un'esèrtzitu terrorista».
Su sigillu guvernativu subra de sos faeddos de màdrighe militare e
bèllica pronuntziados dae Hollande, bi l'at postu Manuel Valls, su primu
ministru chi - sàbadu coladu, su 14 - at cunfirmadu chi sa Frantza at a
sighire cun sas incursiones aèreas subra de sa Sìria «pro corfare - paràulas suas - s'auto-numenadu Istadu islàmicu. Ca - sighit - semus
in gherra e, cunforma a su chi sa Costitutzione nostra previdit, la
devimus sighire pro la bìnchere. Costet su chi costet. E est giustu chi
fìgios e frades nostros l'iscant. Sa Frantza non devet tzèdere e no at a
tzèdere a su terrore e cun issa ateretantu devent fàghere sos
frantzesos».
