 |
| Beirut a pustis de is atentados. Deretos Khalil Hassan, Reuters/Contrasto. Url imàgine |
Nch'est cròmpidu a 43 su nùmeru de is mortos (prus de 240 is fertos) a
pustis de is atentados suitzidas acumpridos eris dae s'Isis in Beirut,
Lìbanu. Su primu kamikaze at seberadu de si sacrificare in una carrera
prena de gente in su bighinadu de Burj el Barajneh. A pagu tretu e a
pagos minutos dae sa prima, sa segunda esplosione, cara a unu tzentru
culturale isciita (su de tres atentadores si nch'est mortu in antis de
si pòdere sacrificare, pròpiu a cajone de is esplosiones).
Su
califu cunsìderat sa periferia meridionale de sa capitale libanesa
comente a una fortilesa de su movimentu Hezbollah. E, pro is sordados
suos, custu est pagu prus o mancu una tropa de infideles. Gente chi, a
su chi narant is jihadistas, meresset de nch'èssere ispèrdida,
mescamente dae cando (dae su 2012) at disinnadu de si nche pònnere a
costàgiu de Bashar Al Assad in sa gherra tzivile siriana.
S'ùrtimu
atentadu contra a Hezbollah in antis de s'atacu dùplitze de eris, est
de su mese de làmpadas de su 2014. Dae su beranu coladu is partidos
isciitas e sunnitas bi fiant renèssidos a cuncordare unos cantos
sistemas de defensa comuna contra a sa minetza terrorìstica.
Sa
resèssida de is atendados de eris ponet a meledare is analistas. Isis
(mancari indebilitadu in Sìria e Iraq) est in cherta de abèrrere unu
fronte nou in s'iscenàriu cunflituale de s'oriente mesanu, ma finamentas
de partzire isciitas e sunnitas libanesos. At a èssere a tretu de nche
cròmpere a custu obietivu?
In s'ìnteri ddoe at àpidu grandu
arrennegu e protestas mannas contra a custa provocatzione. Oe iscolas e
universidades ant disinnadu a abarrare serradas.
