 |
| Fèmina curda. Deretos lìberos. Url imàgine |
S'Isis atacat in Lìbanu, ma est retzende unos cantos corfos in Sìria e
in Iraq. S'ùrtimu est su de Sinjar. No est mancadu su sustennu aèreu de
is americanos, ma sa tzitade nord-irachena, a pagu tretu dae Mosul, est
istada liberada dae unu commando partigianu unidu in ue ddoe agatamus
cumbatentes curdos de Hpg, Yja-Star, Ypj, e Ypg (formatziones ligadas a
su Pkk de Apo Öcalan e a s'ispissu cuadas dae s'informatzione
otzidentale chi faeddat petzi de Peshmerga) e de is brigatas yazidas
Ybs. Ma non semus chistionende petzi de una tzitade liberada.
Cun custu
resurtadu amus sa partzidura de su territòriu de s'Istadu islàmicu a dae
chi Mosul (in Iraq, comente amus bidu) e Rakka (in Sìria) non sunt prus
comunicantes a pare.
Yazidas e Peshmerga los aìamus agatados in is
matessi noas de s'austu de su 2014: tando is fortzas armadas de su
guvernu regionale de su Kurdistan irachenu si nche fiant fuidas cara a
s'avantzada de s'Isis lassende a sa sola sa minoria antiga, defensada
petzi dae is curdos serentes a su Pkk. Is Yazidas ant aderidu a s'idea
de Öcalan, sa de su cunfederalismu democràticu, solutzione proposta pro
collire a pare is etnias diferentes de su logu movende dae s'egualidade e
dae s'unione voluntària de is pòpulos.
