Dae oe sa tzitade frantzesa at a ispartzighinare peri sas
carreras suas e peri sos parcos unu ”esèrtzitu birde”. Chentu òmines chi
ant a cuntrastare sos maleducados chi nch'imbolant a terra sos filtros
de sas sigaretas e sos refudos in generale. Parigi non nde podet prus,
cada annu 6800 operajos comunales nche collint dae terra belle 350
tonnelladas de filtros.
Dae su cumintzu de s'annu su sìndigu aiat
ativadu una campagna longa de sensibilizatzione distribuende manifestos e
fogigheddos a totu sos tzitadinos. Informatziones e cussìgios pro
mantènnere sas carreras netas. Giai in su 2012 su sìndigu aiat proadu a
afrontare su problema de sas tzicas, ma sas abitùdines de sos pariginos
non sunt mudadas. Cando in su 2008 est intrada in vigore sa proibitzione
de pipare in sos locales pùblicos, sas carreras si nche sunt imbrutadas
galu de prus.
Sa promotzione de ocannu imbetzes est mòvida a dae
in antis cun s'installatzione de 30mìgia cofinos pro sigaretas e est
sighida dende a s'indonu, pro totu s'istiu, 15mìgia ischisinadores de
butzaca. Crompende·nche a sas santziones de 68 èuros, chi ant a
cumintzare dae oe. Su matessi tantu chi est prevìdidu pro chie non nche
collit sas làddaras de su cane suo. Sos funtzionàrios ant decraradu chi
sa solutzione de sas multas est abarrada s'ùrtima manera e forsis sa
prus eficatze pro chircare de nch'eliminare su problema. Chie si nch'at a
fàghere agatare in farta, at a pagare su tantu de pagu prus o mancu
deghe pachetes.
Amus a bìdere.
