 |
| Deretos lìberos |
Aiant presentadu su primu aeroportu chi resesset a operare petzi cun
energia solare, como annùntziant chi ant a menguare sas emissiones de
CO2 de su 40% in intro de su 2030. Un'iscummissa coditziosa. S'Ìndia, su
paisu de Mahatma Gandhi, at semper tentu unu raportu armònicu intre
òmine e ambiente, sunt galu atuales sas paràulas suas: “sa terra tenet
sas resursas bastantes pro soddisfare sos bisòngios de su praneta, ma no
ant a èssere mai bastantes a soddisfare sa codìtzia de sos òmines”.
Sa
populatzione indiana contat unu milliardu e dughentos milliones de
pessones, destinadas a aumentare pagu prus o mancu a unu milliardu e
mesu in intro de su 2030. Custu fatu agiuntu a s'isvilupu lestru, rendet
s'Ìndia unu de sos paisos cun sa pertzentuale prus arta de emissiones, a
pustis de Tzina e Iua (istende a sos datos de su 2011). Su primu
ministru at giai promissu chi pro su 2020, s'incuinamentu de CO2 at a
minimare de su 25%.
“In s'ìnteri – at naradu – amus a prantare àrbores e
a creare padentes noos, a manera chi nche suspant cantu prus anidride
carbònica”. Sos ativistas nch'ant collidu cun praghere sos impinnos
“ambientalistas” de su guvernu e ant sutaliniadu chi s'Ìndia est
interessada in primu pranu dae sos cambiamentos climàticos cajonados dae
s'incuinamentu. Su presidente de su Resources Defense Council americanu
at decraradu chi: ”S'impinnu indianu a favore de sas energias
rinnovàbiles at a abèrrere s'àidu a sa sustenibilidade de s'isvilupu
econòmicu e at a creare postos de traballu noos, tutela de sas resursas
ambientales e at a ofèrrere àera sana e abba neta a sos tzitadinos
indianos”.
S'àndala est cussa giusta, como tocat a isetare sas reatziones de sos “babbais” mundiales.
