 |
| Wikimedia |
Sa còmpora de su giornale podet èssere unu gastu ulteriore pro is
tzitadinos chi bivent cada ispètzia de dificultade die cun die. Non sunt
pagos is chi bi rinùntziant. In su matessi tempus cajones (mescamente
tecnològicas) giughent semper prus gente a si nch'istesiare dae is
edìcolas, contribuende a sa crisi de cussu traballu, e a prefèrrere
abonamentos a sa versione pdf.
Is sindacados de is edicolantes Sinagi,
Snag e Usiagi, chi connoschent a manera funduda su cumpartu issoro, ant
àpidu tando un'idea curiosa meda. Si su letore nche torrat su giornale
in intro de sa una de merie, s'edicolante chi aderit a s'initziativa
"leghe e bende" ddi podet torrare sa metade de su dinare gastadu a
mangianu pro ddu comporare. Est a nàrrere, su letore bi ddu torrat a
bèndere. Gasi, chie bolet lèghere su giornale a merie o a sero dd'at a
pagare issu puru a metade. Su matessi mecanismu est prevìdidu pro su
setimanale (chi nche devet èssere torradu in intro de is duas dies a
pustis) e pro is mensiles (in intro de sa chida). Ant a èssere is
edicolantes chi ddoe ant a leare parte a detzìdere cale giornale nch'at a
intrare a sa promotzione e cale nono. S'initziativa at mòvere in is
dies imbenientes.
